Նոկաուտի ենթարկված մրցավարը դատի է տալու Լուիզաոյին
Գերմանացի մրցավար Կրիստիան Ֆիշերը պատրաստվում է դատի տալ «Բենֆիկայի» բրազիլացի պաշտպան Լուիզաոյին և դատարանում պայքարել, որ ֆուտբոլիստն արժանի պատիժ կրի: Այս մասին հաղորդում է The Associated Press-ը:
«Բենֆիկայի» և «Ֆորտունա Դյուսելդորֆի» միջև ընկերական հանդիպման ժամանակ 42-ամյա մրցավարը մի քանի րոպե անշարժ պառկած էր այն բանից հետո, երբ Լուիզաոն հրեց նրան: Մրցավարի խոսքերով՝ ֆուտբոլիստը հարվածել է իրեն: Նա ցնցված է բրազիլացու գործողություններից:
Այդուհանդերձ, «Բենֆիկան» և Լուիզաոն հայտնում են, որ Ֆիշերը պարզապես դերասանություն է անում, քանի որ խաղացողը այդքան էլ ուժեղ չի հրել նրան:
Մարզական լրահոսն ապահովում է SportArmenia.com-ը
