Արթուր Հարությունյան. Իմ երազանքն իրականություն դարձավ
Գյումրու «Շիրակի» դարպասապահ Արթուր Հարությունյանն այսօր, առաջին անգամ իր կարիերայի ընթացքում, հրավիրվել է Հայաստանի ազգային հավաքական: Հիշեցնենք, որ օգոստոսի 13-ին ազգային հավաքականն ուսումնամարզական հավաք կսկսի Ավանի ֆուտբոլի ակադեմիայում, որտեղ պատրաստվելու է օգոստոսի 15-ին «Հանրապետական» մարզադաշտում Բելառուսի հետ ընկերական հանդիպմանը: Ակումբի պաշտոնական կայքի հետ զրույցում Արթուրը կիսվել է իր զգացմունքներով:
– Նախ ցանկանում եմ շնորհակալություն հայտնել հրավերի համար, որ ինձ հնարավորություն է տրվել: Երբ իմացա այդ լուրը, շատ ուրախացա: Անբացատրելի զգացողություններ են: Չէ՞ որ դա երազանք է ցանկացած ֆուտբոլիստի համար: Իսկ իմ երազանքն արդեն իրականացավ:
– Դու երկար տարիներ հանդես ես եկել Հայաստանի ակումբներում, սակայն, ելույթ ունենալով «Շիրակում», ընդամենը 6 ամսից առաջին անգամ հրավիրվեցիր ազգային հավաքական…
– Այո, իմ ֆուտբոլային կարիերայի ընթացքում ես շատ թիմերում եմ հասցրել խաղալ, բայց, հանդես գալով «Շիրակում», ես ստացա այդ հնարավությունը: Ցանկանում եմ շնորհակալություն հայտնել ակումբի ղեկավարությանը, մարզիչներին եւ հատկապես Վարդան Բիչախչյանին, որ հավատացին ինձ, որ վստահեցին իմ ուժերին եւ արդյունքը, կարծում եմ, բոլորի համար էլ ուրախալի է:
– Արթուր, կրկին անգամ շնորհավորում ենք եւ ցանկանում ենք հաջողություն: Վստահ ենք, որ կարդարացնես բոլոր սպասելիքները:
– Շնորհակալություն, առաջ Աստված:
Լուսանկարը` «Շիրակի» պաշտոնական կայքի
Մարզական լրահոսն ապահովում է SportArmenia.com-ը
