Չորս տարի անց
2008 թվականի օգոստոսի 1-ին ձևավորվեց Հայ ազգային կոնգրեսը, որի անդամ 18 կուսակցությունները ստորագրեցին համատեղ հռչակագիր: Դրանում մասնավորապես ասված էր.
ՀՌՉԱԿԱԳԻՐ ՀԱՅ ԱԶԳԱՅԻՆ ԿՈՆԳՐԵՍԻ ՍՏԵՂԾՄԱՆ ՄԱՍԻՆ
Նկատի ունենալով, որ Հայաստանի Համաժողովրդական Շարժումը, ձևավորված լինելով որպես նախընտրական միավորում, ավարտել է իր անմիջական դերակատարությունը,
Մեկնելով այն իրողությունից, որ իշխանությունը Հայաստանում վերստին բռնազավթված է հանցավոր վարչախմբի կողմից, և որ ընտրակեղծիքներն այս անգամ ուղեկցվել են ժողովրդի դեմ իրագործված բիրտ ոճրագործությամբ,
Հաշվի առնելով, որ ետընտրական շրջանում Հայաստանի Հանրապետությունը հայտնվել է մտահոգիչ մարտահրավերների առջև,
Գիտակցելով, որ հրատապ անհրաժեշտություն է առաջացել կազմակերպական նոր ձևի միջոցով Շարժումը հարմարեցնելու այդ մարտահրավերների դիմագրավմանը,
Մենք՝ Շարժման կորիզը կազմող քաղաքական կուսակցությունների ներկայացուցիչներս, հռչակում ենք Հայ ազգային կոնգրեսի ստեղծումը։
Մեզ միավորում է սահմանադրական կարգի հաստատման՝ ազատ, ժողովրդավարական, իրավական, բարգավաճ պետության կերտման և լիարժեք քաղաքացիական հասարակության ձևավորման գաղափարը։
Կոնգրեսի մաս կազմող քաղաքական կուսակցություններն ու հասարակական կազմակերպությունները պահպանում են իրենց լիակատար ինքնուրույնությունը և անկախ գործունեություն ծավալելու, այդ թվում` ընտրություններին առանձին մասնակցելու իրավունքը։ Կոնգրեսը բաց է Հայաստանի և Սփյուռքի բոլոր կուսակցությունների և հասարակական կազմակերպությունների անդամագրման համար։
Կոնգրեսի գործունեության ընդարձակ ծրագիրը նախատեսվում է ընդունել և հրապարակել նրա առաջիկա համաժողովում։
Մինչ այդ, սակայն, հարկ ենք համարում Հայաստանի հասարակությանը ներկայացնել երկրի բարդ ներքաղաքական իրավիճակից թելադրված մեր ընթացիկ խնդիրները.
– Անխտիր բոլոր քաղբանտարկյալների անհապաղ ազատ արձակում.
– Խոսքի, մամուլի, հավաքների ազատության ապահովում.
– Միջազգային փորձագետների նշանակալի մասնակցությամբ մարտի 1-ի ոճրագործության իրապես անկախ հետաքննության իրականացում.
– Առնվազն առաջին պայմանի կատարման դեպքում` երկրի ժողովրդավարական զարգացմանն ուղղված բարեփոխումների շուրջ իշխանությունների հետ երկխոսության ծավալում.
– Արտահերթ նախագահական և խորհրդարանական ընտրությունների անցկացում։
Հայրենիքի ճակատագրով մտահոգված բոլոր ուժերին, կազմակերպություններին և քաղաքացիներին կոչ ենք անում ստվար շարքերով անդամագրվել Հայ ազգային կոնգրեսին։
«Ազատություն» կուսակցություն
«Ազգային վերածնունդ» կուսակցություն
«Այլընտրանք» հասարակական-քաղաքական նախաձեռնություն
«Ժողովրդավարական ուղի» կուսակցություն
«Ժողովրդավարական Հայրենիք» կուսակցություն
«Ժողովրդի իշխանություն» հասարակական-քաղաքական նախաձեռնություն
«Հայ կամավորականների համախմբում» հասարակական-քաղաքական նախաձեռնություն
Հայաստանի ժողովրդական կուսակցություն
Հայաստանի լիբերալ կուսակցություն
Հայաստանի Կանաչների (Սոցիալ-էկոլոգիական) կուսակցություն
«Հայոց հայրենիք» կուսակցություն
«Հայոց համազգային շարժում» կուսակցություն
«Հայրենիք և պատիվ» կուսակցություն
«Հանրապետություն» կուսակցություն
«Մարդու իրավունքներ- 96» կուսակցություն
Պահպանողական կուսակցություն
Սոցիալ-դեմոկրատ Հնչակյան կուսակցություն
«Քրիստոնեա-ժողովրդավարական վերածնունդ» կուսակցություն
