Հայերը սկսել են խնայել տարադրամով
Վերջին շրջանում դրամի արժեզրկումն ազդել է հայաստանցիների խնայողական վարքագծի վրա։ Պաշտոնական տվյալներով՝ դրամային ավանդները եռամսյա կտրվածքով նվազել են 2%-ով, իսկ արտարժութային ավանդները՝ աճել 11.6%-ով։
Ազգային վիճակագրական ծառայության կողմից այսօր հրապարակված տվյալների համաձայն՝ հունիսի վերջի դրությամբ առևտրային բանկերում ՀՀ ռեզիդենտների ներդրած ավանդները կազմել են 845 մլրդ դրամ։ Դա 6.3%-ով գերազանցում է մարտ ամսվա ցուցանիշը։
Սակայն ավանդների աճը համաչափ չի եղել դրամի և արտարժույթի համար։
ՀՀ դրամով ավանդների ծավալը հունիսի վերջին ոչ միայն չի աճել, այլև նվազել է 2%-ով՝ կազմելով 306.7 միլիարդ դրամ (մարտի վերջին՝ 313.1 միլիարդ էր)։ Դրամային ավանդների տեսակարար կշիռն ավանդների ընդհանուր ծավալի մեջ նվազել է 3.1 տոկոսային կետով և այժմ կազմում է 36.3%։
Վարկերի դեպքում պատկերը գրեթե նույնն է. առևտրային բանկերի վարկային պորտֆելում արտարժույթով վարկերի տեսակարար կշիռն աճել է 1.7 տոկոսային կետով և այժմ կազմում է 64.5%։
Նշենք, որ վերը նշված ժամանակահատվածում՝ 2012թ. մարտ-հունիսին, դրամը կայուն կերպով արժեզրկվել է։ Եթե մարտի վերջի դրությամբ 1 ԱՄՆ դոլարն արժեր 388.43 դրամ, ապա ապրիլի վերջին փոխարժեքը դարձավ 392.02, մայիսի վերջին՝ 397.92, հունիսի վերջին՝ 418.01։
