Բնապահպանները Սևանի հարցով դիմել են ԱԺ նախագահին
Այսօր Էկոլոգիական հասարակական դաշինքը տարածել է հայտարարություն: Ստորև ներկայացնում ենք հայտարարություն, որում մասնավորապես նշում է.
«20.06.2012թ. Էկոլոգիական հասարակական դաշինքը դիմել էր ԱԺ նախագահ պարոն Աբրահամյանին պահանջով` ներգրավել հանրությանը ԱԺ Գյուղատնտեսության և բնապահպանության հարցերով մշտական հանձնաժողովի քննարկմանը դրված Սևանա լճից 320 միլիոն խմ ջուր բացթողնման մասին ՀՀ կառավարության նախագծի լսումներին: Սակայն հանրությանը, մեղմ ասած, հնարավորություն չտրվեց մասնակցել վերը նշված նախագծի լսումներին:
ՀՀ Սահմանադրության, Օրհուսի կոնվենցիայի և ՀՀ օրենքների խախտմամբ է ընդունվում ներկայացված օրինագիծը, մասնագետների մասնակցությունը հանձնաժողովի քննարկմանը խոչընդոտվում է: Այս ամենը կասկածի տակ է դնում նախագծի օրինականությունը, այսպիսով` Հայաստանում խախտվում են ժողովրդավարական սկզբունքները և որոշումների ընդունման գործընթացին հասարակության մասնակցության իրավունքը»:
Հիշեցնենք, որ Էկոլոգիական հասարակական դաշինքը այս խնդրով նաև դիմել էր ՀՀ Մարդու իրավունքների պաշտպանին, ում գրասենյակում կազմակերպվել էին լայնածավալ քննարկումներ, և պարոն Անդրեասյանի կողմից հրապարակվել էր հայտարարություն, որտեղ նշված էին մի շարք խախտված օրենքներ` հանրության մասնակցության մասին:
Նկատի ունենալով այս ամենը՝ բնապահպանները պահանջում են հաշվի առնել Սևանա լճի կարևորությունը Հայաստանի և հայ ժողովրդի համար, նրա ռազմավարական, առանցքային նշանակությունը պետության կայուն զարգացման գործում ու չեղյալ համարել այս հարցի` հունիսի 20-ի քննարկումը և նշանակել առանձին ընդլայնված քննարկում` հնարավորություն տալով մասնակցել բոլոր շահագրգիռ կողմերին:
