«Եթե հայերը կարողանային կամավոր խնայել, այս ռեֆորմը պետք չէր». Աշոտ Խուրշուդյանը՝ պարտադիր կուտակային կենսաթոշակային համակարգի ներդրման մասին
![](https://168.am/wp-content/uploads/2017/06/Ashot-Xurshudyan1.jpg)
«Պարտադիր կուտակային կենսաթոշակային համակարգի չհետաձգելը ոչ պոպուլյար քայլ էր Նիկոլ Փաշինյանի կառավարության համար, սակայն դրսի ներդրողները դա դրական են գնահատում»,- այսօր լրագրողների հետ հանդիպման ժամանակ հայտարարեց Մարդկային զարգացման միջազգային կենտրոնի փորձագետ, տնտեսագետ Աշոտ Խուրշուդյանը` խոսելով նոր տեսքով ուժի մեջ մտնող կուտակային կենսաթոշակային համակարգի առանձնահատկությունների և կառավարության կողմից քննարկվող հնարավոր փոփոխությունների մասին:
Ըստ նրա` արտաքին ֆինանսական կառույցները երկրին նայում են երկարաժամկետ և Հայաստանն ավելի վստահելի երկիր է դառնալու: Տնտեսագետի խոսքով` զարգացած մի քանի երկիր կա, որ ավելի մեծ կուտակային ֆոնդեր ունեն, քան երկրի ՀՆԱ-ն է և ամբողջ աշխարհն աշխատում է, իրենք վայելում են. «Ես կերազեմ, որ Հայաստանը դառնա նման երկիր»:
Ա.Խուրշուդյանը նշեց, որ կուտակային կենսաթոշակային համակարգի այլընտրանքի մասին գրեթե չի խոսվել, բայց դրա անհրապույր լինելն է դրդել գնալ դրան:
Նա նշեց, որ Ռուսաստանը վերջերս երկարացրեց կենսաթոշակային տարիքը, որպեսզի աշխատողի վրա ընկնի բեռը.
«Եթե 15-64 տարեկան 6 մարդկանց ընկնում է մեկ թոշակառու, ապա 2060 թ. 2 աշխատողին ընկնելու է 1 թոշակառու: Սա նշանակում է եկամտահարկը շարունակական մեծացնել: Դրանից խուսափելու ուղին կուտակային համակարգն է, համընդհանւոր մակարդակով այն լուծում է ոչ միայն այն հարցը, որ բարձր աշխատավարձ ստացողը բարձր կենսաթոշակ կստանա, այլև այսօրվա սպառումները ինչ-որ չափով զսպելու և ապագայում մեզ պահելու համար է»:
Ա.Խուրշուդյանը նշեց, որ կուտակայինի այլընտրանքը վախենալու է, ինչը դրդում է երկրներին կուտակային համակարգ ներդնել:
Նրա խոսքով` Հայաստանը գնաց համընդհանուր ներդրման ուղիով, և դրանից ամենաշատը տուժեցին այսօրվա կենսաթոշակառուները, քանի որ այսօր կենսաթոշակները չբարձրացվեցին, այլ գրավչություն ստեղծվեց համակարգի մասնակիցների համար` պետության մասնակցության միջոցով:
Տնտեսագետի կարծիքով` նույնիսկ 10 հազար դրամով կենսաթոշակը բարձրացնելու դեպքում շատ մեծ բեռ է լինելու բյուջեի վրա, այդ ուղիով գնալը շատ ավելի մեծ ռիսկեր է պարունակում:
Պարտադիրի ներդրումը հետաձգվելը, Ա.Խուրշուդյանը համեմատեց նրա հետ, որ երեխան լավ չսովորի, թողնեն նույն դասարանում:
Նրա տվյալներով` առնվազն 500 հազար դրամ աշխատավարձ ստացողներն արդեն ունեն 2.5 մլն դրամ խնայված միջոցներ, որի կեսն են իրենք հատկացրել:
Տնտեսագետը նշեց, որ շատ գրավիչ է հետաձգելը, բայց այդ դեպքում ոչ ոք կամավոր չի ներդնում. «Մեր սպառման կառուցվածքը ողբերգական է, յուրաքանչյուր չխնայած դրամ տնետսության վրա բացասական է ազդում: Մենք փոքր, բաց տնտեսություն ենք, և մեր մոտ հակառակ արդյունքն է, որ մասսայական գնաճ է լինում, կամ էլ ներմուծումն է աճում այդքան սպառելու արդյունքում: Եթե հայերը կարողանային կամավոր խնայել, այս ռեֆորմը պետք չէր: Մենք ավելի շատ ծախսոմ ենք, քան ստանում ենք: Եվ մեր վարքագիծը չի փոխվել»: