«Մի շարք երկրներ արդեն վավերացրել են ՀՀ-ԵՄ համաձայնագիրը, դրանց թիվը գնալով ավելանում է». Պյոտր Սվիտալսկի
Եվրախորհրդարանի Արտաքին հարաբերությունների հանձնաժողովի նախագահ Դեյվիդ Մքալիսթերը որևէ խոչընդոտ չի տեսնում Հայաստան-ԵՄ համաձայնագրի վավերացման գործընթացի մասով։ Այսօր լրագրողների հետ հանդիպման ժամանակ Դեյվիդ Մքալիսթերը ողջունեց ՀՀ Ազգային ժողովի կողմից համաձայնագրի միաձայն վավերացումը և նշեց, որ այն չի հակասում Հայաստանի արտաքին այլ պարտավորություններին:
«Համաձայնագրի ստորագրությունն ու վավերացումն ընդամենը սկիզբն է լինելու, կարևորը դրա հաջող իրականացումն է: Ըստ իս՝ այն շահեկան է երկու կողերի համար էլ, և ես մեծ խնդիրներ չեմ տեսնում այդ հարցում»,- նշեց նա։
Հայաստանում Եվրոպական միության պատվիրակության ղեկավար, դեսպան Պյոտր Սվիտալսկին էլ նկատեց, որ ամեն երկիր ունի վավերացման իր ներպետական կարգը. «Մի շարք երկրներ արդեն վավերացրել են համաձայնագիրը, դրանց թիվը գնալով ավելանում է, և մենք վստահ ենք, որ այս գործընթացը հաջողությամբ կպսակվի։ Համաձայնագրի դրույթների 80 տոկոսն արդեն իսկ ուժի մեջ է մտել այս տարվա հունիսի 1-ի, իսկ արդեն հուլիսի 4-ին Եվրախորհրդարանի վավերացումից հետո կողմերը ձեռնամուխ կլինեն դրա լիակատար իրականացմանը»:
Մանրամասները՝ 168.am-ի տեսանյութում։
