Իգոր Դոդոնը Նիկոլ Փաշինյանին հրավիրել է Մոլդովա
Մոլդովայի նախագահ Իգոր Դոդոնն անդրադարձել է Եվրասիական տնտեսական բարձրագույն խորհրդի նիստի շրջանակներում Հայաստանի վարչապետ Նիկոլ Փաշինյանի հետ հանդիպմանը: Մոլդովայի նախագահը Հայաստանի վարչապետի հետ հանդիպման մանրամասներ է հայտնել «Ֆեյսբուք»-ի իր էջում կատարած գրառման միջոցով :
Մոլդովայի նախագահը հանդիպման ընթացքում վերահաստատել է իր մասնակցությունը այս տարվա հոկտեմբերին Երևանում կայանալիք Ֆրանկոֆոնիայի գագաթնաժողովին, ինչպես նաև ՀՀ վարչապետին հրավիրել է այցելել Մոլդովա:
«Եվրասիական տնտեսական բարձրագույն խորհրդի նիստի շրջանակներում ես ծանոթացա Հայաստանի վարչապետ Նիկոլ Փաշինյանի հետ, ընդգծեցի դինամիկ զարգացող երկկողմ հարաբերությունները, մասնավորապես՝ պատմության մեջ առաջին անգամ Մոլդովայի նախագահի այցը Հայաստան 2017թ. նոյեմբերին: Իր կողմից պարոն Փաշինյանը հաստատեց հայկական պատվիրակության մտադրությունը աջակցել Եվրասիական տնտեսական միությունում Մոլդովային դիտորդի կարգավիճակ տալուն: Մա նաև խոսեց մեր ժողովուրդների միջև բարեկամական հարաբերությունների և Մոլդովայի պատմության և մշակութային կյանքին հայերի նշանակալի մասնակցության մասին: Խոսակցության ավարտին ես հաստատեցի իմ մասնակցությունը Ֆրանկոֆոնիայի գագաթնաժողովին, որը կկայանա հոկտեմբերին: Բացի այդ՝ ես Նիկոլ Փաշինյանին հրավիրել եմ այցելել Մոլդովա»,- գրել է Իգոր Դոդոնը:
