ՀՀ մշակույթի նախարարության պարզաբանումը

ՀՀ մշակույթի նախարարությանը վրդովեցրել է «Մշակույթի նա­խա­րարության աշխատակիցները պետության հաշվին արտասահման են մեկնել հանգստի» հոդվածի  վերնագիրը։ Նախարարությունը հերքում է ուղարկել՝ նշելով, թե այն չի համապատասխանում իրա­կա­նու­թյանը:

Նախարարությունը պնդում է, որ իր աշխա­տա­կից­նե­րի արտասահմանյան գործուղում­ներն իրականացվում են բացառապես մի­ջազգային հա­մագործակցության շրջանակներում, մի շարք կոնվենցիաների  և միջազգային կա­ռույց­նե­րի (ՅՈՒՆԵՍԿՕ, ԱՊՀ, ԵԱՏՄ, Եվրամիություն, Եվրոպայի Խորհուրդ, Ֆրան­կո­ֆոնիայի միջազգային կազ­մակերպություն և այլն) նիստերին, խորհրդաժողովներին, խորհրդակցություններին մասնակցելու, Հայաստանի մշակույթը օտարերկրյա պե­տու­թյուններում ամենատարբեր ձևաչափերով (մշակույթի օրեր, քաղաքակրթական ցուցահանդեսներ, միջազգային փառատոներ և այլն), որպես ծրագրի ընդհանուր համակարգող ներկայացնելու, բովանդակային ու կազմակերպչական աշխատանքներ իրականացնելու նպատակով:

Նախարարությունը, հաշվի առնելով վերոգրյալը, «Զանգվածային լրատվության մասին» ՀՀ օրենքի 8-րդ հոդվածի համաձայն, պահանջում է հոդվածի վերնագիրը համապատասխանեցնել բովանդակությանը և օրենքով սահմանված կարգով և ժամկետներում  հրապարակել ՀՀ մշակույթի նախարարության  պատասխանը:

168.am. Սակայն, հարկ ենք համարում նշել, որ ՀՀ ֆինանսների նախարարության աշխատակազմի Ֆինանսաբյուջետային վերահսկողության տեսչությունն է արձանագրել, որ նախարարության աշխատակիցները (բացառությամբ նախարարի և տեղակալների) մեկնել են արտասահման գործուղումների՝ առանց ՀՀ վարչապետի որոշումների՝ խախտելով ՀՀ օրենսդրության պահանջները։ Իսկ այդ նպատակով ՀՀ պետական բյուջեից վճարված գումարը կազմել է 33 մլն 411.6 հազար դրամ:

Այսինքն՝ տվյալ դեպքում, եթե «գործուղում» կոչվածը տեղի է ունեցել օրենքի խախտմամբ, այն չի կարելի անվանել գործուղում։ Հետևաբար՝ այն մասնավոր այցելություն է կամ հանգիստ։