Իսրայելում մեկնարկում է Մարսի վրա գիտական առաքելության կյանքի և աշխատանքի նմանակման գիտափորձը
Իսրայելի հարավի Նեգեւ անապատում փետրվարի կեսերին մեկնարկում է Մարսի վրա գիտական առաքելության նմանակման փորձարարական կայանի աշխատանքը: Անապատի կենտրոնական մասում գտնվող Միցպե Ռամոն խառնարանում, արդեն պատրաստ է մասնագիտացված կառույցը՝ Կարմիր մոլորակի մակերեւույթին D-Mars կայանի սիմուլյատոր-մակետը։
Առաջին արշավախումբն այնտեղ մեկնարկում է փետրվարի 15-ից մինչեւ 18 ընկած ժամանակամիջոցում, հաղորդվում է D-Mars-ի կայքում: Այն կազմակերպվել է Ավստրիայի Austrian Space Forum ընկերության հետ համագործակցությամբ:
«Գիտափորձի մասնակիցները կմեկուսացվեն շրջակա աշխարհից եւ կկարողանան կացարանի սահմաններից դուրս գալ սոսկ սկաֆանդրերով»,- հայտնել է Իսրայելի հեռուստատեսության Իններորդ ալիքը:
Հեռուստաալիքի տվյալներով՝ կայանի մակերեսը ծավալված տեսքով կազմում է 50 քառակուսի մետր, իսկ փորձարարական առաքելությանը մասնակցում են վեց հետազոտողներ: Կայանը բաղկացած է մի քանի սենյակներից՝ ննջարանային հատվածամասից, խոհանոցից եւ սնման բլոկից, ինչպես նաեւ կառավարման կետից եւ լաբորատորիայից, հաղորդել է ՏԱՍՍ-ը:
