«Սա նշանակում է՝ Մարտի 1-ը բոլորիս վիշտն է». Վալերի Օսիպյանը՝ ոստիկանների ձեռքին եղած ծաղիկների մասին
Ինչպես արդեն տեղեկացրել ենք, ոստիկանները և ցուցարարները՝ ծաղիկները ձեռքներին, այս պահին շարժվում են դեպի Մյասնիկյանի արձան: Քիչ առաջ «Ազատություն» ռադիոկայանի ուղիղ եթերում պարզաբանելով այն, թե ինչո՞ւ են ոստիկանները ծաղիկներ վերցրել, Երևանի փոխոստիկանապետ Վալերի Օսիպյանն ասաց. «Սա նշանակում է, որ մենք բոլորս գնում ենք մեր հարգանքի տուրքը մատուցելու, նշանակում է՝ Մարտի մեկը բոլորիս վիշտն է»:
Հարցին՝ սա հե՞շտ բացահայտվող գործ է, ինչո՞ւ չբացահայտվեց մինչև հիմա, Վ. Օսիպյանն այսպես պատասխանեց. «Դա ոստիկանության վարույթում չի, ու այդ հարցում չեմ կարող որևէ բան ասել, որովհետև այդ գործերին չեմ տիրապետում, ամեն ինչ էլ հնարավոր է, հնարավոր է՝ բացահայտվի»: Լրագրողի ճշտող հարցին՝ այսինքն՝ չե՞ք բացառում, որ կպատժվեն մեղավորները, Վ. Օսիպյանն այսպես պատասխանեց. «Չի բացառվում, որ կպատժվեն, եթե բացահայտվի, որ մեղավոր են»:
