Թրամփը համոզիչ հաղթանակ է տարել Նևադայի ներկուսակցական ընտրություններում
Ներկուսակցական ընտրություններում ԱՄՆ նախագահի հանրապետական թեկնածու Դոնալդ Թրամփը համոզիչ հաղթանակ է տարել Նևադա նահանգում՝ հավաքելով ձայների 42%-ը, հայտնում են ամերիկյան ԶԼՄ-ները՝ հղում կատարելով ընտրողների շրջանում անցկացված սեփական հարցումներին:
Կան տվյալներ այն մասին, որ Թրամփը հավաքել է ձայների ամենամեծ քանակությունն անգամ Լատինական Ամերիկայի ընտրողների շրջանում, չնայած նախկինում մի քանի անգամ հայտարարություններ էր արել Մեքսիկայի հետ սահմանին պատ կառուցելու վերաբերյալ:
Երկրորդ տեղի համար պայքարն ընթանում է Ֆլորիդայի սենատոր Մարկ Ռուբիոյի (նախնական արդյունքը՝ 25%) ու Տեխասի սենատոր Թեդ Կրուզի միջև (21%):
Նախնական տվյալներով՝ Նևադայի ընտրություններին մասնակցել է ռեկորդային թվով ընտրող:
Նևադան դարձավ չորրորդ նահանգը, որտեղ անցկացվել են հանրապետականների ներկուսակցական ընտրություններ, որոնցից երեքում հաղթանակել է Թրամփը՝ միայն Այովա նահանգում զիջելով Թեդ Կրուզին:
Հաջորդ ներկուսակցական ընտրությունները տեղի կունենան մարտի 1-ին:
