Մաշկի տեսակները և առանձնահատկությունները

Յուղոտ մաշկ

Յուղոտ մաշկ ունեցող անձանց մոտ ճարպագեղձերը շատ ակտիվանում են հատկապես արբունքի շրջանում։ Մինչեւ շուրջ 20 տարեկանը պետք է կարգավորվեն այս գեղձերի գործունեությունը, հակառակ դեպքում պետք է գտնել ճարպագեղձերի ակտիվացման պատճառները եւ բուժել դրանք։

Յուղոտ մաշկի առանձնահատկություններն են`
– ծակոտիները լայնացած են 
– մաշկը հաստ ու կոպիտ է 
– գույնը դեղնած կամ մթագնած է եւ կարող է միատարր չլինել 
– առաձգականությունը լավ է 
– մաշկի վրա փայլ կա 
– մաշկի վրա կարող են նշմարվել պրոբլեմներ, ինչպես` կոմեդոն, ակնե, ճարպագնդիկներ…

Մաշկի յուղայնության պատճառ կարող են հանդիսանալ` 
– ժառանգականությունը 
– ներքին գեղձերի ակտիվությունը (վահանաձեւ գեղձ, ձվարաններ, եւ այլն) 
– սնունդը – սթրեսները – որոշ դեղամիջոցները 
– արեւը 
– ձեռնահարումը։

Կոմբինացված մաշկ

Կոմբինացված տեսակի մաշկ ունեցողների մոտ երեւում են թե յուղոտ եւ թե չոր հատվածներ։ Ընդհանրապես ճակատի, քթի եւ ծնոտի հատվածը (T գոտի) ավելի յուղոտ է լինում, քան մյուս հատվածները։ Կոմբինացված մաշկի տեսակը ամենատարածված տեսակն է։

Կոմբինացված մաշկի առանձնահատկություններն են` 
– ծակոտիները T գոտում լայնացած են, իսկ մնացյալ մասերում փոքր կամ միջակ են լինում 
– մաշկի խոնավությունը յուղոտ մասերում բարձր է, իսկ մնացյալ մասերում քիչ է 
– յուղոտ հատվածի մաշկը հաստ է, սակայն մնացյալ հատվածներինը նուրբ է 
– յուղոտ հատվածների գույնը դեղնոտ է, իսկ մնացյալ հատվածներինը վարդագույն է 
– յուղոտ հատվածի մաշկն ավելի ձիգ է, իսկ մնացյալ հատվածներինը թույլ է 
– մաշկային դեֆեկտները երեւում են հենց T գոտում – սպիտակ, փոքր ճարպագնդիկներ եւ լայնացած մազանոթներ կարող են նշմարվել չոր հատվածներում` այտերին կամ աչքերի մոտ։

Մաշկը կարող է ունենալ նաեւ այլ հատկություններ։ Այն կարող է լինել զգայուն, ալերգիկ, խոնավազուրկ, այտուցված, կնճռոտված, հասունացած:

Վիկի ՕԴԵ
«168 ԺԱՄ»