Ավելի քան 700 ռուս զինվորականներ են ժամանել Հայաստան՝ փոխարինելու ծառայակիցներին
Ռուսաստանի ուսումնական կենտրոններից եւ Հարավային ռազմական օկրուգի (ՀՌՕ) զորամասերից Հայաստանի ռուսական ռազմակայան Է ժամանել «Գարուն-2015» զորակոչի ավելի քան 700 զինծառայող, ինչը կազմում Է զորակոչով ծառայություն անցնող՝ փոխարինվող զինվորների եւ սերժանտների ընդհանուր թվի շուրջ 40 տոկոսը:
ՌԴ ՀՌՕ-ի մամուլի ծառայության փոխանցմամբ` շրջափոխման կարգով ժամանած զինծառայողները պրոֆեսիոնալներ են, որոնք ուսում են ստացել մասնագիտացված զինվորական ստորաբաժանումներում եւ զորամասերում: Ժամանածների կեսից ավելին ունի բարձրագույն եւ միջնակարգ տեխնիկական կրթություն, ավտոմոբիլային եւ զրահատանկային տեխնիկայի վարման ունակություններ, նրանք նաեւ ջոկերի եւ դասակների հրամանատարներ են:
Մնացած թեկնածուները, որոնք փոխարինման են ժամանել ռազմակայան, տարբեր պրոֆեսիաների մասնագետներ են, որոնք կնշանակվեն կապավորների, հետախույզների, դիպուկահարների, «Նավոդչիկ-2» եւ «Օռլան-10» անօդաչու թռչող ապարատների արդի համալիրների անձնակազմերի անդամների պաշտոններում, ինչպես նաեւ թռիչքային միավորումում եւ հակաօդային պաշտպանության ստորաբաժանումներում:
Գյումրիի եւ Երեւանի զինվորական կայազորների զորամասեր ժամանողներն անցնում են մեկուկեսամսյա ադապտացիոն շրջան, որի ընթացքում նրանք ծանոթանում են միավորման կյանքին, տարածաշրջանի ավանդույթներին, անցնում են բժշկական զննություն եւ պրոֆեսիոնալ-հոգեբանական ընտրություն:
