Ավստրալիան ապաստան կտրամադրի Սիրիայից ու Իրաքից ժամանած ևս 12 հազար փախստականի
Ավստրալիան կընդունի հավելյալ 12 հազար փախստականի, որոնք տուժել են Սիրիայի ու Իրաքի կոնֆլիկտի հետևանքով, հայտնել է երկրի վարչապետ Թոնի Էբոտը:
Ներգաղթյալների գործող քվոտան այս տարի կազմում է 13750 մարդ:
Էբոտի խոսքով՝ հիմնական ուշադրությունը հատկացվելու է կանանց, երեխաներին, հալածանքների ենթարկված փոքրամասնությունների ընտանիքներին, որոնք ապաստան են ստացել Հորդանանում, Լիբանանում, Թուրքիայում, հայտնում է AFP-ն:
Բացի այդ՝ Ավստրալիայի վարչապետը հայտարարել է Իրաքում ու Սիրիայում ԴԱԻՇ-ի դեմ պայքարը շարունակելու մասին:
«ԴԱԻՇ-ի ոչնչացումը կարևոր է ոչ միայն լուծելու համար Մերձավոր արևելքի մարդասիրական ճգնաժամը, այլև Ավստրալիային ու ողջ աշխարհին սպառնացող վտանգը»,- հայտարարել է Էբոտը:
