Ռուսաստանի դեմ նոր պատժամիջոցների օրինագիծը երկրորդ քվեարկությունն է անցել ԱՄՆ Սենատում
Ռուսաստանի և Իրանի նկատմամբ ԱՄՆ պատժամիջոցների խստացման օրինագիծը հուլիսի 29-ին անցել է երկրորդ ընթացակարգային քվեարկությունն ԱՄՆ Սենատում։ Նիստը հեռարձակվել է C-SPAN հեռուստաալիքով։
Այդ փաստաթղթի շուրջ քննարկումներ սկսելու օգտին հանդես է եկել 84 սենատոր, դեմ՝ 12-ը։ Այդ արդյունքները նշանակում են, որ օրինագծի վրա աշխատանքը կարող է շարունակվել, իսկ ավելի ուշ կարող է տեղի ունենալ վերջնական քվեարկությունը։
Օրինագծի վերաբերյալ առաջին ընթացակարգային քվեարկությունը տեղի է ունեցել հուլիսի 28-ին։ Այդ ժամանակ դրա օգտին հանդես է եկել 86 սենատոր, դեմ՝ 12-ը։
Օրինագծի նոր տարբերակով առաջարկվում է խստացնել պատժամիջոցները Ռուսաստանի բարձրագույն քաղաքական և ռազմական ղեկավարության, պետական ընկերությունների, ինչպես նաև այն օտարերկրյա կազմակերպությունների նկատմամբ, որոնք, ըստ ամերիկյան կողմի, աջակցում են Ռուսաստանի ռազմարդյունաբերական համալիրին։ Այն նաև նախատեսում է սահմանափակումներ կիրառել Ռուսաստանի Կենտրոնական բանկի, «Սբերբանկ»-ի, «Գազպրոմբանկ»-ի և ռուսական խոշոր էներգետիկ նախագծերի, այդ թվում՝ «Յամալ СПГ»-ի, «Արկտիկ СПГ»-ի նախագծերի նկատմամբ։
Նախկինում առաջարկվող՝ Ռուսաստանից էներգակիրներ գնող բոլոր երկրների նկատմամբ 500 տոկոսի մաքսատուրք սահմանելու նախաձեռնության փոխարեն օրինագծի նոր տարբերակով առաջարկվում է 100-տոկոսանոց մաքսատուրքեր սահմանել ռուսական նավթի և բնական գազի հինգ խոշորագույն գնորդների, ինչպես նաև այն հինգ երկրների նկատմամբ, որոնք, ըստ ամերիկյան կողմի, օգնում են Ռուսաստանին շրջանցել էներգետիկ ոլորտի արևմտյան պատժամիջոցները։
Ինչպես ավելի վաղ հայտնել է Punchbowl News հարթակը, որը մասնագիտացած է Կոնգրեսի գործունեության լուսաբանման հարցերով, Սենատում մեծամասնություն կազմող հանրապետականները մտադիր են օրինագծի վերաբերյալ վերջնական քվեարկությանն անցնել մինչև շաբաթվա վերջ։ Փաստաթղթի հիմնական հեղինակը եղել է սենատոր Լինդսի Գրեմը, որը մահացել է հուլիսի 11-ին:
Հուլիսի 29-ին ԱՄՆ նախագահ Դոնալդ Թրամփը հայտարարել է, որ աջակցում է Սենատում մշակված վերոհիշյալ փաստաթղթին: Դրա հետ մեկտեղ, Միացյալ Նահանգների ղեկավարի կարծիքով, անհրաժեշտություն չկա, որ Կոնգրեսի Ներկայացուցիչների պալատն օգոստոսին ընդհատի իր խորհրդարանական արձակուրդը ՝ պատժամիջոցների օրինագծի օպերատիվ քննարկման համար:
