ՀԴԲ-ն նախազգուշացրել է «իրանական» սպառնալիքի մասին, սակայն Սպիտակ տունը փորձել է նվազեցնել հարձակման հավանականությունը
Անցյալ ամիս Հետաքննությունների դաշնային բյուրոն (ՀԴԲ) նախազգուշացրել է ԱՄՆ նահանգային և տեղական իրավապահ մարմիններին՝ Իրանի կառավարության կողմից Միացյալ Նահանգների տարածքում թիրախների նկատմամբ բարձրացող սպառնալիքի մասին։ Սա տեղի է ունեցել այն ժամանակ, երբ Սպիտակ տունը փորձել է նվազագույնի հասցնել հարձակման հավանականությունը։ Այս մասին նշված է իրավապահ մարմինների հետախուզական զեկույցում, որին ծանոթացել է Reuters գործակալությունը։
Մարտի 20-ի զեկույցում ՀԴԲ-ն և դաշնային հետախուզական այլ գործակալությունները նախազգուշացրել են, որ Իրանի կառավարությունը «մշտական սպառնալիք է ներկայացնում» ԱՄՆ ռազմական ու պետական անձնակազմի և շենքերի, հրեական ու իսրայելական հաստատությունների, ինչպես նաև Միացյալ Նահանգներում գործող իրանցի այլախոհների համար։
Չնայած այս նախազգուշացումներին՝ ՀԴԲ-ն և Ազգային հակաահաբեկչական կենտրոնը ԱՄՆ-ի համար լուրջ սպառնալիքներ չեն հայտնաբերել, նշված է զեկույցում։
Ի պատասխան վերջին ամիսներին արված հետախուզական այլ գնահատականների՝ նախագահ Դոնալդ Թրամփը հրապարակայնորեն նվազագույնի է հասցրել ամերիկյան տարածքի վրա իրանական հարձակումների հավանականությունը։ Երբ մարտի 11-ին Սպիտակ տանը Թրամփին հարցրել են, թե արդյոք նա մտահոգված է, որ Իրանը կարող է հարձակում գործել ԱՄՆ տարածքի վրա, նա պատասխանել է, որ մտահոգված չէ։
«Անվտանգության վերաբերյալ հանրային իրազեկման զեկույց» խորագիրը կրող մարտի 20-ի փաստաթուղթը հրապարակվել է մի քանի շաբաթ անց այն բանից հետո, երբ Reuters-ը և այլ լրատվամիջոցներ հայտնել էին, որ Սպիտակ տունը արգելափակել է նմանատիպ բովանդակությամբ հետախուզական զեկույցի հրապարակումը։
Այդ ժամանակ Սպիտակ տունը հայտարարել էր, թե հետևում է, որ ցանկացած տեղեկատվություն պատշաճ կերպով ստուգվի նախքան հանրայնացվելը։
