ՏԿԵՆ-ի 3-րդ դրամաշնորհը «Կոտայքի և Գեղարքունիքի ԿԿԹԿ» ՍՊԸ-ին՝ թափոնների կառավարման համար
ՀՀ տարածքային կառավարման և ենթակառուցվածքների նախարարությունն օրերս 3-րդ խոշոր դրամաշնորհն է հատկացրել «Կոտայքի և Գեղարքունիքի ԿԿԹԿ» ՍՊԸ–ին։ ՍՊԸ-ն 60 միլիոն 584 հազար 700 դրամով պետք է իրականացնի կոշտ կենցաղային թափոնների կառավարում։
Ըստ պայմանագրի տեխնիկական բնութագրի՝ դրամաշնորհի ձևով տրվող գումարը պետք է ծախսվի ՍՊԸ-ի կանոնադրական խնդիրները լուծելու աջակցման նպատակով նախատեսվող աշխատանքների համար, այդ թվում՝ ընկերության աշխատակազմի վարձատրության ապահովում, ադմինիստրատիվ շենքի անհրաժեշտ գույքի և համակարգչային տեխնիկայի ապահովում, աղբատար, հատուկ նշանակության և այլ մեքենաների համար վառելիքի ձեռքբերում, բանվորական հագուստի ձեռքբերում, սպասարկման և ապահովագրական, կոմունալ ծախսեր, և այլ միջոցառումների:
Այս ՍՊԸ-ին նախորդ խոշոր դրամաշնորհը տրվել էր 2024-ի դեկտեմբերին։ Դրամաշնորհի չափն այդ անգամ կազմել էր 34 միլիոն 720 հազար 900 դրամ, ապա նաև՝ 2022 թվականին՝ 8 միլիոն 157 հազար 700 դրամ:
Ի դեպ, համայնքային բաժնեմասերով այս ՍՊԸ-ն, ըստ իրավաբանական անձանց ռեգիստրի տվյալների, գրանցվել է դեռ 2016 թվականից, սակայն, ինչպես վկայում է գնումների էլեկտրոնային համակարգը, դրամաշնորհների հատկացումը մեկնարկել է 2022 թվականից։
2021 թվականից այս ընկերության ղեկավարումն իրականացնում է Սերգեյ Համբարձումյանը:
Դեռ հուլիսին կառավարությունն ավետել էր Կոտայքի և Գեղարքունիքի մարզերի կոշտ կենցաղային թափոնների կառավարման ծրագրի մեկնարկի մասին։ Նիկոլ Փաշինյանն անձամբ էր եղել Կոտայքի մարզում։
«14,8 մլն եվրո արժողությամբ ծրագիրն իրականացվել է ՀՀ կառավարության և Վերակառուցման և զարգացման եվրոպական բանկի համագործակցությամբ: Ծրագրի շրջանակում իրականացվել են Հրազդան համայնքում նոր սանիտարական աղբավայրի և Մարտունի ու Ակունք բնակավայրերում աղբի փոխաբեռնման կայանների կառուցապատման աշխատանքները։
Միաժամանակ, երկու մարզերի բոլոր բնակավայրերում ԵՄ չափանիշներին համապատասխան աղբահանության ինտեգրված համակարգի ներդրման նպատակով մշակվել են երկու մարզերի բոլոր բնակավայրերի աղբահանության սխեմաները և կազմվել աղբի հավաքման օպտիմալ երթուղիները։ Սխեմաների հիման վրա ձեռք են բերվել անհրաժեշտ մեքենասարքավորումները։
Աղբահանության ծառայությունների մատուցման և աղբավայրերի ու փոխաբեռնման կայանների շահագործման համար երկու մարզի համայնքների կողմից հիմնադրվել ու գրանցվել է «Կոտայքի և Գեղարքունիքի ԿԿԹԿ» ՍՊԸ-ն»,- տեղեկանում էինք պաշտոնական հաղորդագրությունից։
