Շվեդիան ԵՄ գագաթնաժողովին ընդառաջ Դանիային ԱԹՍ-ների դեմ պայքարի միջոցներ կտրամադրի
Շվեդիայի զինված ուժերը կաջակցեն Դանիային՝ անօդաչու թռչող սարքերի դեմ պայքարի ռազմական միջոցներ տրամադրելով։
Շվեդիայի զինված ուժերի մամուլի հաղորդագրության մեջ ասվում է, որ նման որոշում է կայացվել կառավարության կողմից՝ Կոպենհագենում կայանալիք ԵՄ գագաթնաժողովի ընթացքում անվտանգության բարձրացման նպատակով։ Նշվում է, որ Որոշումը կայացվել է «Դանիայում անօդաչու սարքերի հետ կապված վերջերս տեղի ունեցած միջադեպերի հետևանքով, որոնք խաթարել են երթևեկությունը երկրի մի քանի օդանավակայաններում և կարևոր վայրերում»:
Շվեդիայի զինված ուժերը իրենց հարևաններին կտրամադրեն անօդաչու թռչող սարքերի դեմ պայքարի համակարգեր (Counter UAS): Հայտարարության մեջ նշվում է, որ տրամադրվող միջոցները «ունակ են հայտնաբերել և չեզոքացնել հնարավոր անօդաչու թռչող սարքերը՝ օգտագործելով սենսորներ և խլացնող համակարգեր»:
Ավելի վաղ հայտնի էր դարձել, որ Դանիայում անցկացվելիք ԵՄ գագաթնաժողովի պատճառով սեպտեմբերի 29-ից մինչև հոկտեմբերի 3-ը թագավորության օդային տարածքը փակ կլինի քաղաքացիական անօդաչու թռչող սարքերի համար:
