Մոտակայքում ոչ մի փրկարար չկար. Քոբուլեթիում խեղդված տղայի նշանածը պատմել է դեպքի մասին
Քոբուլեթիում օգոստոսի 26-ին տեղի ունեցած դժբախտ պատահարի ժամանակ ոչ մի փրկարար մոտակայքում չի եղել: Այս մասին ֆեյսբուքում գրառում է արել խեղդված երիտասարդի նշանածը` Արեանա Գրիգորյանը։
Ավելի վաղ հայտնել էինք, որ Սև ծովում` Քոբուլեթիի տարածքում, խեղդվել է 24 տարեկան Սերգեյ Հակոբյանը, նշանածին հաջողվել է փրկել։
«Ուզում եմ, որ բոլորը դադարեն սուտ լուրերի տարածումը։ Ինձ ոչ ոք չի փրկել․ ես ինքս եմ դուրս եկել ջրից։ Ավելին ասեմ՝ նորից հետ եմ նետվել ջուրը, որ կարողանամ նաև իրեն փրկել։
Երբ մենք ջուրն ենք մտել, ալիքները այդքան շատ չեն եղել․ միանգամից է ուժեղացել։ Իսկ այդ պահին ոչ մի փրկարար մոտակայքում չի եղել, որ օգնության գար․ նրանք շատ ուշ են եկել»,- սոցցանցում գրել է Արեանա Գրիգորյանը` հորդորելով սուտ լուրեր չտարածել։
Հավելենք, որ երիտասարդը Գառնի համայնքի բնակիչ էր։ Նա Քոբուլեթի հանգստի էր մեկնել նշանածի ընտանիքի հետ:
Տղան ընտանիքի ավագ որդին էր, 44-օրյա պատերազմի մասնակից. նա 2020 թվականին ժամկետային զինծառայող է եղել ՀՀ զինված ուժերում։
