Հայոց հայրապետն իր Բեռնի ելույթով օրակարգ թելադրեց, Փաշինյանը չի կարող օրակարգ թելադրել․ Օսկանյան

Փաշինյանը չի կարող օրակարգ թելադրել, փոխեք այս մոտեցումը. ֆեյսբուքյան եթերից տեսաուղերձով հայտարարեց ՀՀ նախկին ԱԳ նախարար Վարդան Օսկանյանը՝ ի պատասխան այն պնդումներին, որ թեև Փաշինյանը քաղաքական դիակ է, բայց այդուհանդերձ օրակարգ է թելադրում։

«Հարց՝ քաղաքական դիակը ո՞նց կարող է օրակարգ թելադրել։ Եկեք փոխենք այս մոտեցումը, ինչի՞ ենք Փաշինյանին այդքան արժեք տալիս, իսկապես Փաշինյանն այսօր ի վիճակի չէ օրակարգ թելադրել։ Ինչպես կարող է մի մարդ, որն ընդամենը սոցիալական հարցումներում 10-15 տոկոս հեղինակություն ունի, մի մարդ, որ պատերազմ է բերել, պարտվել, հազարավոր զոհեր է տվել, ՀՀ-ից տարածքներ է հանձնել, երկիրը ծանր վիճակի մեջ է դրել, տնտեսությունը ծանր վիճակի մեջ է դրել, ներսում բաժանումներ են, իշխանությունները թաթախված են բոլոր տեսակի չարաշահումների մեջ հենց բյուջեից, և այդ բոլորի ղեկավարը ո՞նց կարա օրակարագ թելադրի»,-ասաց նա։

Օսկանյանը պնդեց, որ Փաշինյանն ընդամենը իրեն թելադրած օրակարգից պաշտպանվում է։ «Ինքն այսօր արդացաման գործընթացի մեջ է, նա այսօր ՀՀ-ի ամենախոցելի անձն է, նա խնդիր ունի իր իշխանությունը պահելու և պարզապես ընտրել է «հարձակումը լավագույն պաշտպանությունն է» մեթոդիկան»։

Նա օրինակ բերեց եկեղեցու դեմ ոտնձգությունները. «Օրակարգն այնտեղ թելադրել է Հայոց հայրապետը՝ իր ելույթով, Ղարաբաղի հարցում օրակարգ է թելադրում Արցախի խորհրադարանի կողմից ստեղծված հանձնաժողովը, օրակարգ է թելադրում ՀՀ քաղաքացին՝ փողոցում տված իր հարցազրույցով, երբ հակադրվում է Փաշինյանին։ Այսօր դուք եք օրակարգ թելադրում, Փաշինյանը չի կարող օրակարգ թելադրել, փոխեք այս մոտեցումը։ Եթե ուզում ենք իսկապես պայքարենք ու շուտ հաղթենք, մեր մոտեցումը պետք է փոխենք։ Փաշինյանին դրեք իր իսկական տեղը, նա ընդամենը իր անգործությունով պաշտպանվում է»,-ասաց Օսկանյանը։