Պանամայում վախենում են, որ Թրամփը կարող է ջրանցքը վերադարձնելու համար ուժ կիրառել. FT
Պանամայի իշխանությունները մտավախություն ունեն, որ ԱՄՆ նախագահ Դոնալդ Թրամփը կարող է ուժ կիրառել Պանամայի ջրանցքի նկատմամբ վերահսկողությունը վերականգնելու համար, քանի որ երկիրը չունի ո՛չ բանակ, ո՛չ պատերազմի լուրջ փորձ, գրում է Financial Times-ը՝ հղում անելով պանամացի բարձրաստիճան պաշտոնյային, որի անունը չի նշվում:
«Մենք մտահոգված ենք… Մենք կարծում ենք, որ կարող է լինել ինչ-որ պատասխան գործողություն, եթե Թրամփը չստանա այն, ինչ ուզում է։ Այսպիսով, տեսնենք, թե ինչ կարող է լինել բանակցությունների սեղանին»,- պաշտոնյայի խոսքերն է մեջբերում հրատարակությունը։
Հրատարակության համաձայն՝ քչերն են հավատում, որ Թրամփը լրջորեն մտածում է Պանամա ռազմական ներխուժման մասին՝ ջրանցքի նկատմամբ վերահսկողությունը վերականգնելու համար։ Բայց եթե նա հրաման տա զորքեր մտցնել, ապա ընդամենը 4,5 միլիոն բնակչություն ունեցող երկիրը «բանակ չունի և պատերազմի քիչ փորձ ունի», ըստ Financial Times-ի:
Տեղի բնակիչները կարծում են, որ Թրամփը «պետք է հարգի Պանամայի դրոշը», ինչպես նրանք են հարգում ԱՄՆ-ն:
Պարբերականի տվյալներով՝ Թրամփի մտահոգությունը Պանամայի ջրանցքի հարցով սկիզբ է առել իր առաջին վարչակազմից։ Անձնական զրույցի ընթացքում Թրամփը բարձրացրել է ջրանցքի սակագների և սեփականության հարցը և դժգոհություն է հայտնել համաձայնագրից, ըստ այն մարդկանց, ովքեր ծանոթ են Պանամայի այն ժամանակվա նախագահ Խուան Կառլոս Վարելայի հետ 2017 թվականի հանդիպմանը։
