Իրանում հայտարարել են Իսրայելի հարձակման հետևանքով հասցված վնասի վերականգնման մասին
Իրանը կարճ ժամանակամիջոցում վերացրել է այն ամբողջ վնասը, որը հասցվել է երկրի ռազմական ենթակառուցվածքին Իսրայելի հրթիռային հարվածի ժամանակ։ Այս մասին հաղորդում է Mehr գործակալությունը՝ վկայակոչելով Իրանի պաշտպանության նախարար Ազիզ Նասիրզադեին։
«Իր վերջին ագրեսիվ գործողություններով սիոնիստական վարչակարգը պատճառել է աննշան վնաս, որը մենք անհապաղ վերացրել ենք՝ օգտագործելով սեփական գիտական ներուժը», – ասել է նա:
Հոկտեմբերի 26-ի գիշերը Իսրայելը մի շարք ավիահարվածներ է հասցրել Իրանի ռազմական օբյեկտներին՝ ի պատասխան հոկտեմբերի 1-ին Իսրայելի վրա Թեհրանի հրթիռային հարձակումների: Հարձակումից ժամեր անց Իսրայելը հայտարարել էր, որ ավարտել է հարվածները և հասել իր նպատակներին։ Իրանում հայտնել էին, որ հարվածների են ենթարկվել Իլամի, Խուզեստանի և Թեհրանի նահանգները, սակայն հարվածները հաջողությամբ հետ են մղվել: Հարձակման հետևանքով 4 իրանցի զինվորական է զոհվել։
