ՀԱՊԿ-ն արձանագրել է ԻՊ զինյալների թվի աճ Տաջիկստանի հարավային սահմանին
Հավաքական անվտանգության պայմանագրի կազմակերպությունը (ՀԱՊԿ) «Իսլամական պետություն» (ԻՊ) ահաբեկչական կազմակերպության զինյալների թվի աճ է նկատում Տաջիկստանի հարավային սահմանների մոտ։ Այդ մասին ճեպազրույցում հայտարարել է ՀԱՊԿ միացյալ շտաբի պետ, գեներալ-գնդապետ Անդրեյ Սերդյուկովը։
«Կենտրոնական Ասիայի տարածաշրջանում կայունության հիմնական սպառնալիքը գալիս է միջազգային ահաբեկչական և ծայրահեղական կազմակերպություններից, ինչպիսիք են «Իսլամական պետությունը», «Ալ Քաիդան» և այլ կազմակերպություններ, – նրա խոսքերն է մեջբերում ՏԱՍՍ-ը։ – Մասնավորապես, Տաջիկստանի հարավային սահմանի մոտ արձանագրվում է «Իսլամական պետության» աֆղանական մասնաճյուղի՝ «Վիլայաթ Խորասանի» և Պակիստանի թալիբների շարժման թվի աճ։ Նաև ընդլայնվում է նրանց պատրաստության դաշտային ճամբարների ցանցը: Ընդ որում, օտարերկրացի զինյալների հիմնական կազմը կենտրոնացած է Աֆղանստանի հյուսիսային նահանգներում»։
Բացի այդ, ըստ Սերդյուկովի, իրավիճակի վատթարացմանը կարող է նպաստել միգրացիոն հոսքերի աճը՝ «կառավարական զորքերի և ընդդիմության միջև շարունակվող առճակատման, ազգային և կրոնական փոքրամասնությունների ճնշման, ինչպես նաև տնտեսական իրադրության վատթարացման և հումանիտար խնդիրների սրման հետևանքով»։
«Նաև տարածաշրջանում քրեածին իրավիճակի վրա բացասական ազդեցություն են գործում թմրամիջոցների անվերահսկելի շրջանառությունը և զենքի ապօրինի տարածումը», – նշել է ՀԱՊԿ միացյալ շտաբի պետը:
