Գազայի հատվածում 12 մլն տոննա աղբ է կուտակված․ ՄԱԿ
Գազայի հատվածի քաղաքների ու ավանների փողոցներում մոտ 12 միլիոն տոննա աղբ է կուտակվել, որի մաքրման համար կպահանջվի ավելի քան չորս տարի։ Այս մասին ասված է ՄԱԿ-ի Հումանիտար հարցերի համակարգման վարչության զեկույցում։
«Գազայի հատվածում ավերված տներից աղբի և բեկորների քանակը գերազանցում է 12 միլիոն տոննան։ Հաշվի առնելով անկլավի ներկայիս վարչակազմի հնարավորությունները՝ դրանք հեռացնելու համար կպահանջվի ավելի քան չորս տարի», – փաստաթղթից հատված է մեջբերում ՏԱՍՍ-ը։
ՄԱԿ-ի վարչությունն ընդգծում է, որ ավելի քան 650 հազար մարդ կորցրել է կացարանը և «տուն չունի, ուր կարելի լինի վերադառնալ»։
«Հարյուր հազարավոր պաղեստինցիներ ապաստանի և ոչ պարենային առաջին անհրաժեշտության ապրանքների կարիք ունեն, նրանք հարկադրված են մնալու հակասանիտարական պայմաններում», – հայտնել են ՄԱԿ վարչությունում՝ նշելով, որ փախստականների շատ ճամբարներ գերբնակեցված են:
Հոկտեմբերի 7-ին ՀԱՄԱՍ-ի զինյալների ներխուժումից հետո Իսրայելում 1200 մարդ էր զոհվել, շուրջ 250 մարդ՝ գերեվարվել։ Իսրայելը ռազմական գործողություններ է սկսել Գազայի հատվածում, որտեղ զոհերի թիվն, ըստ պաղեստինյան իշխանությունների, գերազանցել է 27 700-ը։
