Երևանի ավագանի Սոնա Աղեկյանի լիազորությունները վաղաժամկետ դադարեցվեցին
Երևանի ավագանու փետրվարի 7-ի արտահերթ նիստում քննարկման են դրվել Երևան քաղաքի ավագանու անդամներ Սոնա Աղեկյանի, Գևորգ Ստեփանյանի և Զարուհի Փոստանջյանի լիազորությունները վաղաժամկետ դադարեցնելու մասին ավագանու որոշման նախագծերը։
Ինչպես հայտնել է քաղաքապետ Տիգրան Ավինյանը, Երևանի քաղաքապետարանի գլխադասային՝ Իրավական հարցերի մշտական հանձնաժողովը դրական եզրակացություն է տվել Սոնա Աղեկյանին մանդատից զրկելու նախագծին։
Սոնա Աղեկյանին ավագանու մանդատից զրկելու հարցի վերաբերյալ զեկուցել է «Հանրապետություն» խմբակցության ղեկավար Անի Խաչատրյանը՝ որպես հիմք ներկայացնելով Երևան քաղաքի ՏԻՄ օրենքի 20-րդ հոդվածի 2-րդ մասը, ըստ որի Երևանի ավագանու անդամի լիազորությունները կարող են վաղաժամկետ դադարեցվել ավագանու անդամների ընդհանուր թվի ձայների մեծամասնությամբ ընդունված որոշմամբ, եթե նա մեկ հերթական նստաշրջանի ընթացքում անհարգելի պատճառով բացակայել է ավագանու նիստերի կամ քվեարկությունների ավելի քան կեսից կամ հանձնաժողովի նիստերի կեսից։
«Ազգային առաջընթաց» խմբակցության անդամ Արամ Թորոսյանը քաղաքական հետապնդում է համարել Սոնա Աղեկյանին մանդատից զրկելը, քանի որ նա ընդդիմադիր գործիչ է եղել և Հայկ Մարությանի քաղաքապետ լինելու ընթացքում, և ներկայում։
Նա կոչ է արել ոչ մի ավագանու չզրկել մանդատից։
Քաղաքապետ Տիգրան Ավինյանն էլ ընդգծել է, որ ավագանու անդամների անգործությանը, որը դրսևորվում է բոյկոտի անձրևանոցի ներքո, համապատասխան օրենքով ու կանոններով սահմանված վերաբերմունք է ցուցաբերվելու, իսկ ավագանու անդամ լինելը նախ և առաջ պարտականություն է։
Նրա խոսքով՝ ոչ ոքի մանդատից չեն զրկում այն պատճառով, որ քաղաքային իշխանություններին շատ է քննադատում, այլ դադարեցվում են ավագանու այն հինգ անդամների լիազորությունները, որոնք ամենաշատը չեն մասնակցել քվեարկություններին։
Քննարկմանը հաջորդել է քվեարկությունը, որի արդյունքում ավագանին 34 ձայնով կողմ է քվեարկել Սոնա Աղեկյանի լիազորությունները վաղաժամկետ դադարեցնելու մասին որոշման նախագծին։
Երևանի ավագանու ՔՊ խմբակցության անդամ Լևոն Լևոնյանն էլ զեկույց է ներկայացրել ավագանու անդամ Գևորգ Ստեփանյանի լիազորությունների դադարեցման վերաբերյալ։
Նա նշել է, որ քաղաքապետարանի Կազմակերպական վարչության համապատասխան գրության համաձայն՝ Գևորգ Ստեփանյանը մասնակցել է նստաշրջանի ընթացքում տեղի ունեցած 42 քվեարկություններից ընդամենը 7-ին, իսկ բացակայությունների հարգելի լինելու վերաբերյալ տվյալներ քաղաքապետարանին չեն ներկայացվել։
Այնուհետև հայտարարվել է մեկժամյա ընդմիջում։
