ՀՀ-ին կադաստրի վկայական տվողը մենք չենք. Կադաստրի կոմիտեի ղեկավար
Հայաստանի Հանրապետությանը կադաստրի վկայական տվողը Կադաստրի կոմիտեն չէ։ Լրագրողների հետ ճեպազրույցում ասաց Կադաստրի կոմիտեի ղեկավար Սուրեն Թովմասյանը։
«ՀՀ վարչապետի խոսքը, իմ կարծիքով, վերաբերել է նրան, որ Հայաստանի սահմանները դեմարկացված ու դելիմիտացված չեն։ Կադաստրի կոմիտեն տալիս է անշարժ գույքի գրանցման վկայականներ»,- ասաց նա։
Հայաստանի Հանրապետությունում անշարժ գույքի ձեռքբերման սահմանափակում գոյություն ունի միայն գյուղատնտեսական հողերի վրա։ «Գյուղատնտեսական հողերը չեն կարող ձեռք բերել այլ պետությունների քաղաքացիներ, մնացած բոլոր դեպքերում բոլորը նույն ձևով կարող են դիմել անշարժ գույք ձեռք բերելու համար»,–ի պատասխան լրագրողների` արդյոք թուրքերը կամ ադրբեջանցիները կարող են ՀՀ–ում անշարժ գույք ձեռք բերել հարցին, ասաց Թովմասյանը։
Թովմասյանի խոսքով` երբ ՀՀ սահմանները կլինեն դեմարկացված ու դելիմիտացված, դա ինքնին կնշանակի, որ Հայաստանի սահմանները փաստագրված են ու Հայաստանն ունի իր սուվերեն տարածքի վերաբերյալ տեղեկատվությունը։
Անդրադառնալով սահմանազատման ու սահմանագծման գործընթացին կոմիտեի ղեկավարը նշեց, որ իր համար ամենակարևորն իրավական գնահատականն է, որի հիման վրա միայն կարելի է ասել, թե որ քարտեզների հիման վրա կարելի է գործընթացն անել։
«Այդ աշխատանքները տարվում են, ՀՀ փոխվարչապետի գլխավորությամբ կա խումբ, որտեղ իմ տեղակալներն էլ մասնակից են, ամենօրյա աշխատանք է տարվում»,- նշեց նա։
Նա ընդգծեց, որ երբ արդյունքներ լինեն՝ հրապարակային տեղյակ կպահվի այդ մասին։
