Հայաստանում էապես աճել է POS տերմինալներով գնումների քանակը. ԿԲ պաշտոնյա
Հայաստանում էապես աճել են POS տերմինալներով գնումները, կանխիկացման գործարքների քանակը թեև մեծ է, սակայն չի աճել:
Այս մասին ասաց Կենտրոնական բանկի Ֆինանսական կայունության և կարգավորման դեպարտամենտի տնօրեն Գարեգին Գևորգյանն ԱԺ-ում պատգամավորների և Կենտրոնական բանկի ներկայացուցիչների հանդիպմանը:
«Վճարային քարտերով ֆիզիկական POS տերմինալներով և վիրտուալ տերմինալներով գործարքների քանակներն աճել են: Եվ ծավալային, և քանակային առումով աճել են բոլոր գործարքները: Իհարկե, դեռ մեծ է կանխիկացման գործարքների ծավալը, բայց քանակային առումով նայելիս տեսնում ենք, որ կանխիկացման գործարքների քանակը չի աճել, էապես աճել է ֆիզիկական POS տերմինալներով գնումների քանակը»,-ասաց Գևորգյանը:
Գարեգին Գևորգյանը սա համարեց բավականին դրական տեղաշարժ, անկանխիկ վճարումների մշակույթի ձևավորում:
Քաղաքացիներն անկանխիկ եղանակով հիմնականում գնումներ են կատարել սուպերմարկետներում, մթերային խանութներում, այնուհետև սննդի կետերում՝ ռեստորաններում, հաջորդում են հյուրանոցները: Ըստ նրա՝ էական աճ կա նաև առողջապահության ոլորտում անկանխիկ գործարքների առումով:
«Անկանխիկ գործառնությունների մասին» ՀՀ օրենքի համաձայն՝ Երևան քաղաքում գործունեություն իրականացնող բժշկական հաստատություններում մատուցվող բոլոր տեսակի բժշկական ծառայությունների դիմաց վճարները 2022 թվականի հուլիսի 1-ից ընդունվում են միայն անկանխիկ ձևով, 2023 թվականի հուլիսի 1-ից՝ նաև ՀՀ մարզերի վարչական կենտրոններում: Իսկ 2024 թվականի հուլիսի 1-ից` այլ բնակավայրերում ևս առողջապահական ծառայությունների դիմաց վճարումը կատարվում է անկանխիկ ձևով:
