Գեներալ-լեյտենանտի օրինախախտ և ոչ սթափ վիճակում գտնվող որդու Mercedes-ը տեղափոխվեց «գայի պլաշադկա» (լուսանկարներ)
Այսօր՝ փետրվարի 20-ին, Երևանի Ճանապարհային ոստիկանության աշխատակիցների կողմից ՃՈ հատուկ պահպանման տարածք է տեղափոխվել Երևան քաղաքի Բաղրամյան 42 շենքի բնակիչ Էդմոնդ Ավագյանի կողմից վարած «Մերսեդես» մակնիշի 77 NՏ 777 համարանիշի ավտոմեքենան: Այս մասին հաղորդում է shamshyan.com կայքը:
Ինչպես հայտնում ֆոտոլրագրող Գագիկ Շամշյանը, վարորդը՝ Է. Ավագյանը, խախտելով երթևեկության կանոնները, Թումանյան փողոցից դեպի Մաշտոցի պողոտա ընկած հատվածում ավտոմեքենան կայանել է հանդիպակաց գոտում, որտեղ քննչական գործողություններ էին կատարում ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչները:
Քննչական գործողությունները կապված են եղել այսօր՝ գիշերը ժամը 03:00-ի սահմաններում նշված հատվածում տեղի ունեցած ավտովթարի փաստով:
Է. Ավագյանը փորձել է խույս տալ ՃՈ աշխատակիցներից, սակայն դա նրան չի հաջողվել, ինչից հետո նրան տեղափոխել են բժշկական փորձաքննության՝ պարզելու համար սթափության աստիճանը: Բժշկական փորձաքննությամբ պարզվել է, որ նա ավտոմեքենան վարել է ոչ սթափ վիճակում, իսկ դիմապակուց բացակայել են ԱՊՊԱ և տեխզննման կտրոնները:
Ֆոտոլրագրողը հայտնում է, որ օրինախախտ վարորդը նախկինում աշխատել է ոստիկանության կազմակերպված հանցավորության դեմ պայքարի գլխավոր վարչությունում, իսկ նրա հայրը երկար տարիներ աշխատել է ոստիկանության համակարգում, հետո եղել է ՀՀ գլխավոր հարկադիր կատարողը, ով կոչումով գեներալ-լեյտենանտ Անատոլի Ավագյանն է:
