«Նույնիսկ Քիմ Քարդաշյանից էին կարծիք հարցրել․ հումորները շատ լավն էին»․ Հրաչյա Սարգսյան
![](https://168.am/wp-content/uploads/2022/04/Hrachya-Sargsyan-1.jpg)
Այսօր մինչ Երևանի Քաղաքապետարանի ամենշաբաթյա գործակարգավարական նիստին անցնելը քաղաքապետ Հրաչյա Սարգսյանը ցանկացավ անդրադառնալ այն խոսակցություններին, որոնք ծավալվել էին հուլիսի 23-ին իր հայտնի ֆեյսբուքյան գրառումից հետո:
«Ես վստահ եմ՝ քաղաքը պիտի շուտ արթնանա, աշխատանքային օրը պիտի վաղ սկսվի:
Այսուհետ առավոտյան 07:00 -ից յուրաքանչյուր ժամը մեկ Երևանի քաղաքապետարանի աշտարակային ժամացույցից լսվող երաժշտությունն կհնչի նաև միաժամանակ 12 վարչական շրջաններում:
Բացի այդ մեր համաքաղաքացիները օրվա ժամին ու օդի ջերմաստիճանին դարձյալ կարող են ծանոթանալ նաև Ա. Սպենդիարյանի անվան օպերայի և բալետի ազգային ակադեմիական թատրոնի շենքի տանիքին տեղադրված նոր LED էկրանից»,- գրել էր Երևանի քաղաքապետը:
Նրա խոսքով՝ ինքը չէր պատկերացնում, որ իր գրառումն իրականում այդքան մեծ իրադարձություն է լինելու:
«Իհարկե, ուրախալի է, որ մեր երևանաբնակները և ոչ միայն երևանաբնակները, մարզերից բոլորը Երևանին մեծ պատասխանատվությամբ են վերաբերվում և Երևան համայնքում տեղի ունեցող իրադարձություններին իրենց վերաբերմունքն են ցուցաբերում»,- ասաց քաղաքապետը՝ նշելով, որ դա շատ լավ է և գովելի է, և ինքը համոզմունք ունի, որ նույն ջանասիրությամբ քաղաքացիները մեկը մյուսին նկատողություն են անելու, օրինակ, աղբը թափելու, կանգառի սրահները փչացնելու համար, ու համատեղ փորձելու են Երևանում ծառացած խնդիրները լուծել:
Հրաչյա Սարգսյանը նկատեց՝ միգուցե իր ընկալումները մի փոքր սխալ էին, սակայն կցանկանար մանրամասնել, որ Երևանի աշտարակում հնչում է «Էրեբունի-Երևան» հիմնը, որի խոսքերի հեղինակը Պարույր Սևակն է, իսկ երաժշտությանը՝ Էդգար Հովհաննիսյանը, և յուրաքանչյուր ժամը մեկ 3-4 վայրկյան այդ ղողանջներն են հնչում:
«Վարչական շրջաններում տեղադրվել է համակարգ, որտեղ այդ նույն ղողանջները ժամը մեկ հնչում են: Ես կարծում եմ, որ դա քաղաքին մի լավ կոլորիտ է»,- ասաց Երևանի քաղաքապետը:
«Ինչ վերաբերում է նրան, որ այդ զանգերը խանգարում են տարբեր մարդկանց, և հիմա առավոտյան ժամը 7-ից արթնացնելու են, կցանկանայի մի բան ասել:
Իրականում այդ թեմայով լավ հումորներ կային: Բայց այդ համակարգն իմ հայտարարությունից 25 օր առաջ արդեն աշխատում էր, և վստահ եմ՝ իմ հայտարարությունից հետո մարդիկ նույն ձև արթնացել են, և իրենց կյանքում այդքան շատ բան չի փոխվել: Պարզապես իմ ֆեյսբուքյան էջում հայտարարել էի, որ կա ներդրված նման համակարգ»,- ասաց Երևանի քաղաքապետը:
Վերջինս կրկին շեշտեց՝ կարևորում է նման ուշադրությունը Երևանի նկատմամբ:
«Նույնիսկ Քիմ Քարդաշյանին էին հարցրել՝ ի՞նչ կարծիք ունի»,- ասաց Երևանի քաղաքապետը: