Վիեննա, Բիրմինգհեմ, Ռուանդա․ բյուջեի հաշվի ուղևորություններից վերադարձած իշխանական պատգամավորները մի ամիս արձակուրդ կգնան․ «Հրապարակ»
«Հրապարակ» թերթը գրում է․ «Ազգային ժողովի իշխանական ֆրակցիան՝ իր նիկոլական պատգամավորներով, այս տարի լիուլի օգտվեց բյուջեի ընձեռած հնարավորություններից։ Նրանք, ովքեր ժամանակին կերազեին անգամ Աղվերանում պիկնիկի մասին, այսօր «ՀՀ հպարտ քաղաքացիների» վճարած հարկերի հաշվին ճամփորդում են էկզոտիկ երկրներում եւ լուրջ դեմքով փողկապավոր հանդիպումներ ունենում տարատեսակ պաշտոնյաների հետ, որոնց անգամ հեռուստացույցով չէին կարող մոտիկից տեսնել։
ԱԺ նախագահ Ալեն Սիմոնյանի կարգադրությունների բաժնում կարդում ենք, որ Ազգային ժողովի պատգամավորներին (բացառությամբ ԱԺ նախագահի), 2022 թվականի հուլիսի 18-ից օգոստոսի 26-ը ներառյալ, տրամադրվել է 2022 թվականի ամենամյա հերթական արձակուրդը՝ 30 աշխատանքային օր։ Իսկ իրեն՝ ԱԺ նախագահին, ինքը՝ Ալեն Սիմոնյանը, տրամադրել է ավելի կարճ արձակուրդ՝ 2022 թվականի հուլիսի 22-ից օգոստոսի 5-ը ներառյալ։
Այդ ընթացքում Ազգային ժողովի նախագահի պարտականությունների ժամանակավոր կատարումը դրվել է ԱԺ նախագահի տեղակալ Ռուբեն Ռուբինյանի ուսերին։ Մինչ այդ, սակայն, Ալեն Սիմոնյանը հասցրել է որոշ ՔՊ-ական պատգամավորների, այդ թվում՝ նույն Ռուբեն Ռուբինյանին, գործուղել էկզոտիկ ու եվրոպական երկրներ՝ աշխատանքային բնույթի արձակուրդի։ Օրինակ՝ 2022 թվականի հուլիսի 1-2-ը նույն Ռուբինյանին գործուղել է Վիեննա՝ Թուրքիայի հատուկ ներկայացուցչի հետ հանդիպելու։
Գրեթե նույն օրերին՝ հունիսի 30-ից հուլիսի 3-ն էլ, Վիեննա էր գործուղվել Ազգային ժողովի եվրոպական ինտեգրման հարցերի մշտական հանձնաժողովի նախագահ Արման Եղոյանը, ով դրանից ընդամենը երկու օր անց՝ 2022 թվականի հուլիսի 5-10-ը մեկնել էր Կիգալիա՝ Ռուանդայի Հանրապետություն, որ մասնակցի Ֆրանկոֆոնիայի խորհրդարանական վեհաժողովի լիագումար նստաշրջանի աշխատանքներին։ Եղոյանի հետ Կիգալիա էին մեկնել նաեւ ՔՊ-ական պատգամավոր Մերի Գալստյանն ու Ազգային ժողովի աշխատակազմի արտաքին կապերի վարչության միջազգային կազմակերպությունների բաժնի գլխավոր մասնագետ Էդուարդ Բադոյանը։
Այդ ընթացքում մեկ շաբաթով՝ 2022 թվականի հուլիսի 1-7-ը, ՔՊ-ական զբոսաշրջիկների մեկ այլ խումբ էլ մեկնել էր Բիրմինգհեմ (Մեծ Բրիտանիայի եւ Հյուսիսային Իռլանդիայի Միացյալ Թագավորություն), որ մասնակցեր Եվրոպայի անվտանգության եւ համագործակցության կազմակերպության խորհրդարանական վեհաժողովի (ԵԱՀԿ ԽՎ) տարեկան 29-րդ նստաշրջանի աշխատանքներին։ Նրանց թվում էին ԵԱՀԿ ԽՎ պատվիրակության ղեկավար, Ազգային ժողովի արտաքին հարաբերությունների մշտական հանձնաժողովի նախագահ Էդուարդ Աղաջանյանը՝ DJ Էդոն, եւ պատվիրակության անդամ հանդիսացող այլ ՔՊ-ական պատգամավորներ՝ Մարիա Կարապետյանը, Հռիփսիմե Գրիգորյանը եւ Սարգիս Խանդանյանը։
Այս ուղեւորություններից վերջերս վերադարձած անձինք հիմա էլ, փաստորեն, մի ամբողջ ամիս արձակուրդ են գնում, ասենք` մի հատ էլ Հուրգադայում, Դուբայում կամ գոնե Քոբուլեթիում հանգստանալու համար: Պատգամավորի աշխատավարձն ու պարգեւավճարները լիովին թույլատրում են դա, մանավանդ՝ եթե հաշվի առնենք, որ ընդդիմադիրների փողերը կտրել են եւ տվել ՔՊ-ականներին` որպես պարգեւավճար»։
