Հռոմի Պապը, հնարավոր է, օգոստոսին այցելի Կիև․ Սուրբ Աթոռի ներկայացուցիչ
Սուրբ Աթոռի արտաքին քաղաքական գերատեսչության ղեկավար, արքեպիսկոպոս Փոլ Ռիչարդ Գալահերը չի բացառել, որ Հռոմի պապ Ֆրանցիսկոսը կարող է Ուկրաինա այցելել արդեն օգոստոսին։
«Պապը համոզված է, որ եթե կարողանար այց կատարել, դա դրական արդյունքներ կունենա: Նա ասաց, որ կգնա Ուկրաինա, և միշտ ցանկություն է հայտնել այցելել Մոսկվա, ինչպես նաև հանդիպել Ռուսաստանի իշխանությունների հետ»,- ասել է Գալահերը Rai1 հեռուստաալիքի եթերում։
Հարցին, թե արդյոք ուղևորությունը Կիև կարող է տեղի ունենալ Կանադայից վերադառնալուց հետո, ուր պոնտիֆիկոսը կմեկնի հուլիսի վերջին, Գալահերը պատասխանել է.
«Այո, ես կարծում եմ, որ Կանադայից վերադառնալուց հետո մենք իսկապես կսկսենք ուսումնասիրել այդ հնարավորությունը»։
Խոսելով օգոստոսի սկզբին այցի հնարավորության մասին՝ Գալահերն ասել է.
«Թերևս ես դա չբացառեի, բայց շատ բան կախված է Կանադա ուղևորության արդյունքներից։ Կտեսնենք, թե ինչպես է Պապը դիմանում այդ ճանապարհորդությանը, որը շատ լարված է լինելու և հետո կտեսնենք»:
