Չի կարելի Հռոմի պապից ավելի կաթոլիկ լինել. Սերժ Սարգսյան
Մարդկանց առողջությունը և բնությունն անվերադարձ քայքայելու գնով հանքարդյունաբերությունը և արդյունաբերությունը զարգացնելու ժամանակներն անցել են: Այդ մասին, ըստ «Արմենպրեսի»՝ ասել է ՀՀ նախագահի թեկնածու, ՀՀԿ առաջնորդ Սերժ Սարգսյանը հունվարի 23-ին նախընտրական քարոզարշավի շրջանակներում հանդիպելով Քաջարանի բնակիչներին:
Նախագահի թեկնածուն նշել է, որ չի կարելի Հռոմի պապից ավելի կաթոլիկ լինել՝ ցանկացած նոր արդյունաբերական ձեռնարկություն ստեղծելիս կամ հանքավայր շահագործելիս անիմաստ աղմուկ սստեղծելով: Նրա խոսքով՝ Հայաստանը դեռ չունի շատ զարգացած երկրների հնարավորությունները՝ հանքերի օգտագործումն ապագային թողնելու համար: «Մենք իրավունք չունենք գոտիներս ամբողջովին ձգել, ասել` ոչ, մենք ընդերքը հիմա ընդհանրապես չենք շահագործելու կամ շահագործելու ենք 70 կամ 100 տարի հետո»,- «Արմենպրես»-ի փոխանցմամբ՝ ասել է Սարգսյանը՝ հավելելով, որ երկրի ընդերքն անհրաժեշտ է շահագործել խելամտորեն և արդյունավետ:
Ուշադրություն է դարձվելու բնապահպանական խնդիրներին: Սարգսյանը հավաստիացրեց, որ նկատի է առնվում մեր ունեցած բնական համեստ ռեսուրսները խելամտորեն տնօրինելու և շահագործելու կարևորությունը:
Նախագահի թեկնածուն նշեց, որ ինքը ասում է ոչ վերացական, բարդ բաներ, այլ այն, ինչ բոլորի մտքին է: «Օրինակ լավ կրթություն մեր երեխաների համար կամ մատչելի առողջապահություն բոլորի համար»,- ասել է Սարգսյանը: Նա կարևորեց աշխատատեղերի հարցը՝ նշելով, որ դա կլուծի տնտեսական և սոցիալական բազմաթիվ հարցեր:
Նախագահի թեկնածուն քաջարանցիներին հիշեցրեց Գարեգին Նժդեհի 7 ասույթներից՝ ցավով նշելով, որ այսօր արդիական է հնչում մեծ գործչի 5-րդ պատգամը՝ ոչ մի ընչազուրկ քո հողի վրա: Նախագահի թեկնածուն նշեց, որ այդ հարցը Հայաստանում դեռևս լուծված չէ և պետության քայլերն ուղղված են աղքատության կրճատմանը: «Եկել եմ ձեզ ասելու, որ ձեր մտահոգությունները իմ մտահոգություններն են, ձեր խնդիրները, իմ խնդիրներն են»,- ասել է Սարգսյանը: Նրա խոսքով՝ այդ խնդիրների լուծումները կան և դրանք համատեղ ջանքերով են իրագործելի:
Սերժ Սարգսյանը սթափության կոչ է արել՝ սխալներից խուսափելու համար: «Կոչ եմ անում քվեարկել այնպես, ինչպես ձեր խիղճն է ձեզ հուշում»,- ասել է Սարգսյանը: Նախագահի թեկնածուն ասել է, որ ցանկանում է լինել ժողովրդի կողմից ընտրված ցանկալի նախագահ:
ՀՀ նախագահի թեկնածու Սերժ Սարգսյանը հունվարի 22-23-ին հանդիպումներ է ունենում Սյունիքի մարզի մի շարք քաղաքային և գյուղական համայնքներում: Հունվարի 23-ին նա կայցելի Վայոց ձորի մարզ: Հայաստանում նախագահական ընտրությունները կանցկացվեն փետրվարի 18-ին:
