Ի՞նչ է սերը…
Հավատն առանց սիրո մարդուն դարձնում է մոլեռանդ, հարստությունն առանց սիրո մարդուն դարձնում է ագահ, ընտանիքն առանց սիրո մարդուն դարձնում է անտուն։ Ինչու՞ է սերը համարվում առաքինությունների աղբյուր։ Ս. Պողոս առաքյալն ասում է, որ անգամ հզոր հավատքն առանց սիրո ոչինչ է (Ա Կորնթ. 13: 1-3):
Սիրո մասին բազմիցս խոսվել ու գրվել է: Աստվածաշնչում այն դրվում է հավատի և հույսի կողքին: «Բայց արդ, մնում են հավատ, հույս, սեր. սրանք` երեքը. և սրանցից մեծագույնը սերն է» (Ա Կորնթ. 13:13): Հավատում ենք, որ կփրկվենք, և երբ գա այդ օրը, հավիտենության մեջ հավատքն իր տեղը զիջելու է տեսությանը, քանզի ինչին որ հավատում ենք, արդեն տեսնելու ենք, իսկ ակնհայտ իրողությունը հավատի կարիք չի զգում: Հույս ունենք, որ կփրկվենք, և երբ գա այդ օրը, այլևս հույս տածելու կարիք չի լինի, քանի որ ինչի հանդեպ որ հույս ենք տածում, այն ստանալու ենք: Միայն սերն է, որ մնալու է։ Ուրեմն, ի՞նչ է սերը…
Սերը՝ երբ որ հարցնում են, թե մամային եմ շատ սիրում, թե պապային, չեմ իմանում ճիշտ պատասխանը:
Հրաչ, 5 տարեկան
Սերը՝ որ իմ սիրած ուտելիքն եմ տանում դպրոց, բայց տալիս եմ Արմինեին, որովհետև ձեռքը կոտրելուց հետո առաջին օրն էր, որ եկել էր դպրոց… Ու որովհետև ինքը լավն է:
Համլետ, 13 տարեկան
Ջութակն է ու իմ մյուս հոբբիները: Ամեն ինչ՝ դասերից բացի:
Եվա, 18 տարեկան
Բանակում հայրենիքն էր ու հայրենիքի պաշտպանությունը: Հիմա hետ եմ եկել, արդեն կարծես թե հայրենիքը չէ, բայց դեռ չգիտեմ, թե ինչն է: Կամ էլ երևի չգիտեմ, թե հայրենիքն ինչ է:
Հովհաննես, 21 տարեկան
Ես ավելի շատ նյութականի հետ եմ ասոցացնում: Երևի դրա պատճառով էլ չեմ սիրում խոսել սիրուց:
Նարե, 21 տարեկան
Սերը մեր դեռ չծնված երեխան է ու ընտանիք ունենալու զգացումը: Հրաշքին սպասելու զգացումն է ու ապահովությունը:
Մոնիկա, 22 տարեկան
Սերը՝ երբ լուսանկարում եմ:
Արամ, 24 տարեկան
Ինքդ քեզնից գոհ լինելն է, խղճիդ առաջ մաքուր լինելն է սերը: Եվ սիրած գործով զբաղվելը:
Նաիրա, 30 տարեկան
Իմ ընտանիքն է, երեկոյան ընթրելը մի սեղանի շուրջ:
Կարինե, 39 տարեկան
Սերը՝ երբ աղջիկս շատ պարզ հարցեր է տալիս, ես համբերատար ու մեծ սիրով պատասխանում եմ, բայց եթե փողոցում մեկը նույն հարցերը տա, հունից դուրս կգամ:
Սուրեն, 42 տարեկան
Սերը, ես ինչքան հասկացել եմ, նպատակներ ունենալն է կյանքում, անիմաստ չապրելը, աշխարհի երեսին մեզնից մի բան թողնելն է:
Մուշեղ, 56 տարեկան
Ե՛ս եմ սերը, չէ՞, մամ:
Նարե, 4 տարեկան
«Աստված Սեր է» (Ա. Հովհաննես 4:8-9)
