Երբ, ով և ինչպես կարող է առաջադրվել նախագահի թեկնածու. մանրամասնում է սահմանադրագետը
Եթե ՀՀ նախագահ Արմեն Սարգսյանը 1 շաբաթվա ընթացքում հետ չվերցնի հրաժարականի մասին իր դիմումը, ապա նրա լիազորությունների դադարեցման մասին արձանագրություն կկազմի և կստորագրի ԱԺ նախագահը, և դրա հրապարակման պահից հրաժարականը կհամարվի ընդունված. հայտարարել է ԱԺ նախագահ Ալեն Սիմոնյանը:
Ավելի վաղ հայտնել էինք, որ Արմեն Սարգսյանի՝ հունվարի 23-ին Հանրապետության նախագահի պաշտոնից հրաժարականից հետո` մինչև նորընտիր նախագահի կողմից պաշտոնի ստանձնումը, Հանրապետության նախագահի լիազորությունները կատարում է Ազգային ժողովի նախագահը:
Սահմանադրագետ Վարդան Այվազյանը 168.am–ի հետ զրույցում մանարամասնեց՝ երբ, ով և ինչպես կարող է առաջադրվել նախագահի թեկնածու:
«Նախագահի հրաժարականից հետո Սահմանադրությունն ամրագրում է՝ ոչ շուտ, քան 25, և ոչ ուշ, քան 35 օրվա ընթացքում պետք է տեղի ունենա նոր նախագահի ընտրություն: Սահմանադրության համաձայն՝ նախագահի պաշտոնում կարող է առաջադրվել այն անձը, ում 40 տարին լրացել է, վերջին 6 տարում համարվում է միայն ՀՀ քաղաքացի և վերջին 6 տարում մշտապես բնակվում է ՀՀ տարածքում:
Նախագահի թեկնածուներ առաջադրելու իրավունք ունի Ազգային ժողովի 1/4-ը: Այսինքն, տեսականորեն, 4 թեկնածու կարող է լինել. ըստ էության, ընդդիմությունը կարող է իր թեկնածուին առաջադրել:
Նախագահն առաջին փուլով ընտրված է համարում, եթե ձայների 3/4-ը հավաքի»,- ասաց սահմանադրագետը:
Այդուհանդերձ, առկա քաղաքական իրավիճակում Վարդան Այվազյանը հավանական չի համարում առաջին փուլով նախագահի ընտրությունը և ներկայացնում է մյուս փուլերով ընտրության կարգը:
«Երկրորդ փուլում ընտրվելու համար անհրաժեշտ է հավաքել ձայների 3/5-ը, իսկ եթե 3/5-ը չկա, երրորդ փուլում արդեն շատ ձայներ հավաքած առաջին երկու թեկնածուներն են մասնակցելու միայն. նրանցից պահանջվում է արդեն ընդհանուր ձայների թվի մեծամասնությունը, այսինքն՝ ԱԺ-ի կեսից ավելիով»,- եզրափակեց մասնագետը:
Նկատենք՝ ըստ Սահմանադրության՝ եթե Հանրապետության նախագահ չի ընտրվում, ապա տասնօրյա ժամկետում անցկացվում է նախագահի նոր ընտրություն` նույն փուլերով։
Հիշեցնենք՝ ՀՀ Սահմանադրության 126 հոդվածի համաձայն՝ ՀՀ նախագահի հրաժարականի պահից ոչ շուտ, քան 25, և ոչ ուշ, քան 35 օրվա ընթացքում պետք է անցկացվի նոր ընտրություն:
Հիշեցնենք նաև՝ ՀՀ 4-րդ նախագահ Արմեն Սարգսյանը Հանրապետության նախագահ էր ընտրվել Ազգային ժողովի կողմից 2018թ. ապրիլին՝ յոթ տարի ժամկետով:
