Արսենյանի որոշումը Ծառուկյանի առաջադրվելուց կախված չէր. մամուլ
«Հրապարակ» օրաթերթը գրում է. «Երեկ ԲՀԿ-ում մասամբ տոնական տրամադրություն էր. Ծառուկյանի հայտարարությունը, որով նա հավաստել էր, որ չի մասնակցելու ընտրություններին, չի էլ սատարելու որևէ մեկին, շատերին էր հանգիստ շունչ քաշելու «ֆորա» տվել, նրանք պատրաստ էին գրազը տարվածների բոլոր վնասները փոխհատուցել: Ի դեպ, մեր տեղեկություններով, ՀՀԿ բարձրաստիճան պաշտոնյաներից մեկն էլ առավել բարձրաստիճան պաշտոնյայի հետ գրազում թանկարժեք կոստյում է «պարտվել»:
Փոքր-ինչ այլ էր ԲՀԿ քոչարյանական թևի հոգեվիճակը: Նրանք չէին պատասխանում զանգերին, պատասխանելիս էլ խիստ սակավախոս էին. ակնկալիքները չէին արդարացել, նրանք գտնում էին, որ մեծ վակուում առաջացավ երկրում, որը հնարավոր չի լինի կարճ ժամկետում լցնել, իսկ այսպես և այդքան ամայացած քաղաքական դաշտով ընտրությունների չեն գնում:
ԲՀԿ 2 թևերի «կենտրոնում» գտնվող ՄԱԿ լիդեր Գուրգեն Արսենյանից փորձեցինք ճշտել` հնարավո՞ր է, որ դուրս գա ԲՀԿ-ից: «Նմանատիպ ակնարկ հասարակությանը ես չեմ արել, այդ թեզը լրագրողներն են պտույտի մեջ դրել: Ինչ վերաբերում է իմ պատգամավորական գործունեությանը և քաղաքական թիմի անդամ մնալու խնդրին, ապա դա կախված չէ նրանից` Ծառուկյանն առաջադրվում է նախագահի թեկնածու, թե` ոչ, այլ կապված է այն արժեքային համակարգի հետ, որի կրողը ԲՀԿ-ն իրեն համարում է: Եթե արժեքային համակարգում ինչ-որ բան փոխվի, այդ ժամանակ ես կփոխեմ նաև իմ որոշումը, իմ որոշումը ես եմ կայացնում, և ԲՀԿ-ի հետ մեր քաղաքական համագործակցությունը չի սկսվել պայմանով, որ Գագիկ Ծառուկյանը նախագահի թեկնածու պետք է լինի»»:
