Կամերային երաժշտության ազգային կենտրոնը գարնանային համերգաշարը կբացի Հայկ Մելիքյանի մենահամերգով
Անվանի դաշնակահար, ՀՀ վաստակավոր արտիստ Հայկ Մելիքյանի մենահամերգով կազդարարվի Կամերային երաժշտության ազգային կենտրոնի գարնանային համերգաշրջանի բացումը։
Երեկոն տեղի կունենա մարտի 3-ին Կոմիտասի անվան կամերային երաժշտության տանը: Համերգին կհնչեն Ֆ. Շոպենի, Ռ. Շումանի, Ֆ. Լիստի, Պ. Ի. Չայկովսկու և Ռ. Վագների ստեղծագործությունները:
«Անչափ ուրախ եմ այս անգամ ելույթ ունենալ մի ծրագրով, որը կատարելու եմ սիրելի ուսուցչիս՝ պրոֆեսոր, դաշնակահար Ալեքսանդր Գուրգենովի հիշատակին. այս տարի նա կդառնար 70 տարեկան: Ի դեպ, ծրագրում ներառել եմ բացառապես ռոմանտիկ կոմպոզիտորների ստեղծագործություններ, որոնց վրա դեռ տարիներ առաջ աշխատել եմ ուսուցչիս հետ։ Նաև մեծ ուրախությամբ եմ փաստում իմ վերադարձը այս գեղեցիկ համերգասրահ: Նախկինում զրկված ենք եղել պատշաճ գործիքի առկայությունից, այդ իսկ պատճառով արդեն բազում տարիներ այս դահլիճում հանդես չեմ եկել։ Սա ինձ համար խորհրդանշական և պատասխանատու համերգ է»,- նշում է Հայկ Մելիքյանը:
Դաշնակահարի պրոդյուսեր Ալեքսանդր Պլատոն գովելի է համարում այն, որ երկար սպասված Yamaha մակնիշի համերգային դաշնամուրը վերջապես հանգրվանեց Կամերային երաժշտության տանը, և այսուհետ դաշնամուրային երեկոները հավուր պատշաճի կկազմակերպվեն՝ ի ուրախություն թե՛ կատարողի, թե՛ ունկնդրի: «Որպես մենեջեր՝ սա ինձ համար անչափ կարևոր խնդիր էր, որի լուծման համար, իհարկե, շնորհակալ ենք Ճապոնիայի կառավարությանը և ՀՀ-ում Ճապոնիայի դեսպան պարոն Ջուն Յամադային»,- ընդգծում է Հակոբյանը:
