«Երևան քաղաքի բնակիչները խաբված են. այսօր քաղաքում համաճարակ է». Արմեն Ներսիսյան
«Քաղաքային իշխանություններին ինչ հարցով դիմում ես, ասում են՝ մենք այդ մասին գիտենք, բայց սայլը տեղից չի շարժվում»,- այսօր լրագրողների հետ հանդիպմանն այս մասին ասաց Երևանի ավագանու ԲՀԿ խմբակցության անդամ Արմեն Ներսիսյանը:
«Գետառի հարցով բազմիցս դիմել ենք քաղաքային իշխանություններին, որ Գետառը մաքրելուց 10 օր հետո նորից աղտոտվում է, 37 մլն դրամը իզուր մի ծախսեք մաքրելու համար, բայց ականջալուր չեղան: Գետառը նորից կեղտոտ է, այնտեղ նորից առնետներ, ինչ խոլերային իրավիճակ ասես՝ կա: Երևան քաղաքի բնակիչները խաբված են, որ բակ այց ենք կատարում, բնակիչները խայտառակ ձևի վիրավորանքներ են հասցնում: Երևանցին իրականում խաբվել է, որովհետև հավատաց ռեկլամներին, իսկ հիմա խիստ վիրավորված է քաղաքային իշխանություններից»,- ասաց նա՝ ընդգծելով՝ քաղաքային իշխանությունները բնակիչների հետ չեն հանդիպում, ոչ մեկ ոչինչ չի ուզում անել:
«Երևանցիներն ասում են՝ մենք հավատացինք, բայց այսօր համաճարակ է քաղաքում, ոչ մի ծառատունկ չեղավ, ոչ մի բնակարանաշինություն չեղավ, ոչ մի հարցով քաղաքային իշխանությունները չեն զբաղվում: Ծառերն էտելիս էնքան վերքեր են դրանց վրա թողել, որ այդ ծառերը հիմա սարսափելի վիճակում են, չորանում են, որովհետև ոչ մասնագետներ են այդ ծառերն էտել: Մեր հավաստի աղբյուրներով՝ ավտոլվացման կետի աշխատողին տարել են՝ ծառ են էտել տվել: Դրա համար ունենք այն, ինչ ունենք»,- ընդգծեց նա:
