«Մյուս շաբաթ մենք կլինենք այլ գիշատիչ». Կլոպ

«Լիվերպուլի» գլխավոր մարզիչ Յուրգեն Կլոպը խոսել է ակումբի նախապատրաստական մարզումների և հանդիպումների մասին:

«Այս նախընտրական շրջանը շատ տարօրինակ է: Բոլորը մշտապես մեզ շնորհավորում են, շնորհավորում, շնորհավորում: Մենք ընկերասեր մարդիկ ենք, ուստի մենք անընդհատ ասում ենք՝ շնորհակալություն, շնորհակալություն:

Նախքան «Նապոլիի» հետ խաղը, անձնակազմը մեզ տվեց մի շիշ կարմիր գինի: Շատ հաճելի է: Իրավիճակը արտասովոր է, բայց դա պարտության պատճառ չէ:

Երբ քո թիմի կազմում բացակայում է 6 խաղացող, դա տարօրինակ է: Մենք սովոր ենք այն բանին, որ խաղացողները վնասվածքներ են ստանում նախապատրաստական մարզումների ժամանակ, դա տեղի է ունենում ժամանակ առ ժամանակ: Բայց երբ նրանք մեզ հետ չեն լինում հենց սկզբից, երբ նրանք չեն գալիս մի քանի օր, հաճելի չէ: Բայց մենք պատրաստվում ենք այնքան լավ, որքան հնարավոր է:

Մենք պետք է ներդնենք մեր ուժերը 100 տոկոսով՝ սկսած մրցաշրջանի սկզբից:

Լավ նորությունն այն է, որ մրցակիցները հիմա ուզում են մեզ վերլուծել, մտածում են, թե ամեն ինչ պարզ է, բայց մյուս շաբաթ մենք կլինենք այլ գիշատիչ»,- ասել է Կլոպը:

Ընկերական խաղի ընթացքում Յուրգեն Կլոպի թիմը պարտվեց «Նապոլիին» (0:3): «Լիվերպուլը» երեք պարտություն է կրել վերջին չորս ընկերական հանդիպումներում և մեկ անգամ խաղն ավարտել է ոչ-ոքի արդյունքով:

Սիրարփի Աղաբաբյան