Հունան Պողոսյանը պատրաստ է վեթինգի
«Մտավախություններ չունեմ, ոնց կվերաբերի բոլորին, ինքս պատրաստ եմ ընդհանուր հիմունքներով ենթարկվել: Ինքս մտավախություններ չունեմ»,- այսօր Աժ-ում լրագրողների հետ զրույցում հայտարարեց Սյունիքի մարզպետ Հունան Պողոսյանը՝ դրական արտահայտվելով վեթինգի մասին:
Թե ի՞նչ իրավիճակ է Սյունիքի մարզում սևազգեստների առումով՝ հարցին, Հ.Պողոսյանը պատասխանեց, որ Սյունիքում ապրում է իրավահարգ ժողովուրդ, իսկ քրեածին հանցավոր միջավայրի տարրեր միշտ եղել են ու կան.
«Դրա համար կան պատկան մարմիններ, որոնք պատշաճ մակարդակով իրենց գործառույթն են իրականացնում: Դա պետք է կրի մշտական բնույթ, և պատկան մարմինները մշտապես պետք է զբաղվեն քրեածին հանցավոր միջավայրում որևէ կերպ իրենց հեղինակություն համարողների և որևէ կերպ իրենց օրենքից վեր դասողների դեմ»:
Անդրադառնալով հակահեղափոխական տրամադրություններին՝ մարզպետը նշեց, որ այս պահին Սյունիքում չի տեսնում նման տրամադրություններ ունեցող մարդկանց, հակառակը՝ գնում է ստեղծագործ աշխատանք, համայնքներից մեկի՝ Գորայքի ղեկավարը հրաժարական տվեց որոշակի տարաձայնությունների պատճառով, անցած կիրակի ընտրություններն անցկացվեցին:
Հարցին՝ բոլոր համայնքների ղեկավարների հետ կարողանո՞ւմ է աշխատել, Հ.Պողոսյանը պատասխանեց. «Կարծում եմ՝ այո»:
