««Իմ քայլը» պատեհ պահի կքննարկի ՀԱԿ-ի առաջարկը
«Սահմանադրական բարեփոխումները մեր օրակարգում են, սակայն պետության կառավարման մոդելի փոփոխության հետ կապված՝ մենք քննարկումներ դեռ չենք ունեցել և պատեհ պահի կքննարկենք նաև այդ առաջարկը»,- այսօր խորհրդարանական ճեպազրույցների ժամանակ հայտարարեց ԱԺ «Իմ քայլը» խմբակցության անդամ, ԱԺ փոխնախագահ Լենա Նազարյանը՝ պատասխանելով հարցին, թե ի՞նչ դիրքորոշում ունեն ՀԱԿ-ի առաջարկի՝ Սահմանադրական կարգի փոփոխության շուրջ:
Ըստ նրա՝ ցանկացած քաղաքական ուժ ցանկացած պահի կարող է առաջարկներ ներկայացնել, ՀԱԿ-ի առաջարկը որևէ ժամանակով պայմանավորված չէ:
Լ.Նազարյանի խոսքով՝ Ընտրական օրենսգրքի բարեփոխումներն անխուսափելի են, և կառավարության ծրագրի քննարկումների ժամանակ այդ մասին խոսվել է: Նա նշեց, որ այդ հարցն անցնում է ԱԺ օրակարգ, և ընդդիմադիրների հետ հանգիստ կքննարկեն. «Դա լինելու է, առանց դրա՝ ես չեմ պատկերացնում քաղաքական դաշտի առողջացումը հետագայում»:
Հիշեցնենք, որ Հայաստանի առաջին նախագահ Լևոն Տեր-Պետրոսյանի գլխավորած կուսակցությունն իր ծավալուն հայտարարությունում առաջարկում է, մասնավորապես, մեկ տարվա ընթացքում իրականացնել սահմանադրական հանրաքվե` վերադառնալով կիսանախագահական կառավարման համակարգին, նոր Սահմանադրությամբ նախատեսված կարգով հաջորդ մեկ տարվա ընթացքում անցկացնել հանրապետության նախագահի ընտրություններ, արմատապես փոխել Ընտրական օրենսգիրքը՝ անցում կատարելով 100 տոկոս համամասնական ընտրակարգի, արմատախիլ անել կոռուպցիան, վերացնել ոչ բնական մենաշնորհները, երաշխավորել մրցակցային հավասար պայմաններ բոլոր տնտեսվարողների համար, ընդունել հակամենաշնորհային քաղաքականության նոր օրենսդրություն, էապես կրճատել ստվերային տնտեսությունը, դատական համակարգը մաքրել, ազատել դատավորի բարձր կոչումը վարկաբեկած, կոռումպացված ու կամակատար դատական կադրերից, կիրառել անցումային արդարադատություն:
