Մաշկաբանության և սեռավարակաբանության բժշկական կենտրոնը պարզաբանում է տարածել ինքնահրկիզման փորձի առնչությամբ
Մաշկաբանության և սեռավարակաբանության բժշկագիտական կենտրոնը հայտարարություն է տարածել հունվարի 24-ին արձանագրված ինքնահրկիզման փորձի հետ կապված: ՀՀ առողջապահության նախարարության «Մաշկաբանության և սեռավարակաբանության բժշկագիտական կենտրոն» ՓԲԸ-ի հաղորդագրության մեջ նշվում է.
«Քաղաքացի Գառնիկ Վարդանի Խաչատրյանը միջադեպից երկու շաբաթ առաջ դիմել է «Մաշկաբանության և սեռավարակաբանության բժշկագիտական կենտրոն» բուժման նպատակով, հիվանդը մոտեցել է բժշկին և ներկայացրել է խնդիրները, որից հետո հիվանդին դրվել է նախնական ախտորոշում և ներկայացվել է բուժման համար անհրաժեշտ վճարման կարգը, ինչպես նաև հիվանդին տեղեկացվել է, որ պետական պատվերի ուղեգրի հնարավորության դեպքում անհրաժեշտ բուժումը կարող է տրամադրվել դրա շրջանակներում, որից հետո պացիենտը հայտնել է, որ չունի նշված ուղեգիրը: Մեկ շաբաթ անց պացիենտը կրկին այցելել է կենտրոն և հայտնել, որ դիմել է պոլիկլինիկա, որտեղ ստացել է բուժում, սակայն դա իրեն չի օգնել և ցանկանում է բուժվել այստեղ և չի կարող ներկայացնել ուղեգիր, քանի որ չունի համապատասխան կարգ և անձը հաստատող փաստաթղթեր, որի հիման վրա իրեն պետության կողմից կտրամադրվի ուղեգիր: Բժիշկը կրկին հիվանդին ներկայացրել է բուժման և վճարման կարգը, որին ի պատասխան հիվանդը ոչ վայել վարք է դրսևորել և հեռացել»,- ասված է հաղորդագրության մեջ:
Նշվում է, որ ևս մեկ շաբաթ անց՝ հունվարի 24-ին հիվանդը մոտենում է կենտրոն, աղմուկ բարձրացնում, ներխուժում բժշկի սենյակ, իր վրա վառելիք լցնում և սպառնում, որ կինքնահրկիզվի: Դեպքին անմիջապես արձագանքել է կենտրոնի բուժանձնակազմը` տնօրենի գլխավորությամբ և կանխել այդ միջադեպը, որից հետո հիվանդը անմիջապես առանձնացվել է սենյակում և տեղի է ունեցել առանձնազրույց: Կենտրոնի ղեկավարության կողմից ձեռնարկվել են համապատասխան միջոցառումներ՝ դեպքի վայր է անմիջապես հրավիրվել ՀՀ արտակարգ իրավիճակների նախարարության ԱԻՆ ՓԾ հրշեջ-փրկարարական ջոկատից մեկ մարտական հաշվարկ, ճգնաժամային կառավարման ազգային կենտրոնի օպերատիվ խումբը, հոգեբանական աջակցության բաժնի հրահանգիչը և ցուցաբերել է անհրաժեշտ հոգեբանական աջակցություն:
«Տնօրենի կողմից նաև կապ է հաստատվել ՀՀ առողջապահության նախարարության բժշկական օգնության քաղաքականության վարչության պետ՝ Դավիթ Մելիք-Նուբարյանի հետ և ներկայացվել է միջադեպը, որից հետո առաջարկվել է պացիենտին ժամանակավոր հոսպիտալացնել՝ մինչև ՀՀ առողջապահության նախարարությունը կկազմակերպի համապատասխան փաստաթղթերի ձևակերպումը բուժման համար: Հիվանդն այդ ընթացքում անցել է համապատասխան հետազոտություններ և իրականացվում է համապատասխան բուժում:
Հիվանդի վերաբերյալ հստակ փաստաթղթային արձանագրում չկա, քանի որ հիվանդի կողմից չի տրամադրվել անձը հաստատող փաստաթղթեր (նշում է, որ անձնագիր և սոցիալական քարտ չունի), ուստի հիվանդության պատմագրում լրացված տվյալները նշված են այնպես, ինչպես ինքն է ներկայացրել»:
