Քուվեյթը հայտնել է իրանական ԱԹՍ-ների նոր հարձակումների մասին

Քուվեյթի բանակը հայտնել է, որ հակաօդային պաշտպանությունը ներկայում պայքարում է իրանական անօդաչու թռչող սարքերի հարձակումները կասեցնելու ուղղությամբ։ Այս մասին գրառում է արվել Քուվեյթի զինված ուժերի X-ի էջում։

Գլխավոր շտաբից նախազգուշացրել են, որ լսվող ցանկացած պայթյուն հակաօդային պաշտպանության համակարգերի կողմից «թշնամական հարձակումները կասեցնելու արդյունք է»։

Բանակը կոչ է արել բնակչությանը հետևել համապատասխան մարմինների կողմից տրված անվտանգության և պաշտպանության հրահանգներին։

Իրանի Իսլամական հեղափոխության պահապանների կորպուսն (ԻՀՊԿ) իր հերթին հայտարարել է Քուվեյթում գտնվող երկու ամերիկյան բազաների վրա հարձակման մասին։

«Անօդաչու թռչող սարքերով հարվածներ ենք հասցրել Ալի ալ-Սալեմ ավիաբազայում գտնվող մեծ ռազմական տեխնիկայի պահեստի, Patriot հրթիռային պաշտպանության համակարգի և ամերիկյան զորքերի համար նախատեսված MQ-9 անօդաչու սարքերի կայանի վրա»,- նշվել է հայտարարության մեջ։

ԻՀՊԿ-ն նաև հայտարարել է ամերիկյան զորքերի տեղակայման վայրի և ալ-Ադիրի զորանոցում գտնվող երկու ուղղաթիռների կայանի վրա հարձակում իրականացնելու մասին։