ԱՄՆ-ն և Իրանը շարունակում են ինտենսիվ հարվածներն արդեն 10 օր
ԱՄՆ-ն և Իրանը ինտենսիվ հարվածներ են փոխանակում արդեն 10 օր շարունակ։ ԱՄՆ զինված ուժերի կենտրոնական հրամանատարությունը (CENTCOM) X հարթակում հայտարարել է, որ հերթական հարվածներն է հասցրել Իրանի ռազմական հրամանատարական կենտրոններին, ծովային հնարավորություններին, հրթիռների և անօդաչուների արձակման կայանքներին և հակաօդային պաշտպանության համակարգերին:
Ըստ CENTCOM-ի՝ նաև շարունակվում է Հորմուզի նեղուցով առևտրային նավերի ուղեկցումը։
«Մայիսի սկզբից CENTCOM-ի ուժերն օժանդակել են մոտ 900 առևտրային նավերի և 450 միլիոն բարել հում նավթի տարանցմանը», – նշված է հաղորդագրության մեջ։
Միևնույն ժամանակ CNN-ը, վկայակոչելով Պենտագոնին, հաղորդում է, որ հուլիսի 7-ին հակամարտության վերսկսումից ի վեր իրանական հարվածներից վիրավորվել է գրեթե 100 ամերիկացի զինծառայող։ Ավելի վաղ հաղորդվել էր, որ վերջին օրերին ամերիկացի 3 զինծառայող է զոհվել։ ԱՄՆ նախագահ Դոնալդ Թրամփը հայտարարել է, որ յուրաքանչյուր զոհված զինծառայողի համար Իրանին շատ ծանր հարվածներ կհասցվեն։
Իրանի նախագահ Մասուդ Փեզեշքիանը հայտարարել է, որ երկիրն այժմ լայնածավալ պատերազմ է մղում ԱՄՆ-ի դեմ։
Ըստ IRNA գործակալության՝ ի պատասխան վերջին հարվածների՝ Իրանը հարվածել է Բահրեյնում և Քուվեյթում ամերիկյան ռազմական օբյեկտների, այդ թվում՝ հակաօդային պաշտպանության համակարգերի, անօդաչու թռչող սարքերի, ռադարային կայանքների։ Բահրեյնում նաև թիրախավորվել է Amazon ընկերության ենթակառուցվածքներից մեկը։ Իսլամական հեղափոխության պահապանների կորպուսը հայտնել է նաև Հորդանանում ռազմական օբյեկտի հարվածելու մասին։
Բացի այդ, հարվածներ են հասցվել Հորմուզի նեղուցում երկու նավթատար լցանավի. փրկարար խմբերն, ըստ լրատվամիջոցի, հեռացնում են նավերի անձնակազմերին։
