Ինդոնեզիայում զբոսաշրջիկը մահացել է կայծակի հարվածից
Ինդոնեզիայի Հարավային Սուլավեսի նահանգում Մոնրոլո լեռան գագաթին կայծակի հարվածից մեկ զբոսաշրջիկ մահացել է, ևս չորսը՝ վիրավորվել, հաղորդում է ANTARA լրատվական գործակալությունը՝ հղում անելով փրկարարական ծառայություններին։
Մակասարի որոնողական-փրկարարական վարչության ղեկավար Մուհամմադ Արիֆ Անվարի խոսքով՝ ողբերգությունը տեղի է ունեցել կիրակի երեկոյան, երբ հինգ զբոսաշրջիկներից բաղկացած խումբը բարձրացել է Մոնրոլո լեռան գագաթը, որը մոտավորապես 1109 մետր բարձրություն ունի։
«Չորս մարդ ողջ է մնացել, մեկը մահացել է։ Մահացածը 25-ամյա Ֆաուզանն էր, Մարոս շրջանի բնակիչ»,- ասել է Անվարը։
Փրկարարների խոսքով՝ վերելքի ժամանակ եղանակը կտրուկ վատացել է։ Չնայած ուժեղ անձրևին, զբոսաշրջիկները հասել են գագաթ և որոշել են լուսանկարել։ Այդ պահին խմբին հարվածել է կայծակը։
