Պակիստանում գնացքի պայթեցման հետևանքով կան տասնյակ զոհեր և վիրավորներ
Պակիստանում զինվորականների տեղափոխող գնացքի պայթյունի հետևանքով զոհվել է առնվազն 20 մարդ, ևս 70-ը վիրավորվել է։ Այս մասին հաղորդում է BBC-ն։
Պայթյունը տեղի է ունեցել մայիսի 24-ի առավոտյան, երբ գնացքն անցնելիս է եղել Բելուջիստանի նահանգի կենտրոն Քվետա քաղաքի կայարաններից մեկով։
Երկաթուղային ոլորտի պաշտոնյաները BBC Urdu-ին հայտնել են, որ լոկոմոտիվը և երեք վագոն դուրս են եկել գծերից, իսկ երկուսը շրջվել են։ Գնացքում հիմնականում գտնվում էին զինծառայողներ և նրանց ընտանիքների անդամներ, որոնք տուն էին վերադառնում Էյդ ալ-Ադհա տոնի առթիվ։
Պակիստանյան Dawn լրատվամիջոցը գրում է 14 զոհի և 20 վիրավորի մասին, Al Jazeera-ն իր հերթին, վկայակոչելով պաշտոնյաների, նշում է, որ զոհվել է առնվազն 24 մարդ, ավելի քան 50-ը՝ վիրավորվել։
Հարձակման պատասխանատվությունը ստանձնել է «Բելուջիստանի ազատագրական բանակ» անջատողական խմբավորումը՝ հայտարարելով, որ ահաբեկչությունն իրագործել է մահապարտ ահաբեկիչը։
Պակիստանի վարչապետ Շեհբազ Շարիֆը խստորեն դատապարտել է հարձակումը՝ ասելով, որ «նման վախկոտ ահաբեկչական գործողությունները չեն կարող թուլացնել Պակիստանի ժողովրդի վճռականությունը»։
Հիվանդանոցներում, որտեղ տուժածները բուժում են ստանում, հայտարարվել է արտակարգ դրություն։
