Իրանում երկու մարդ մահապատժի է ենթարկվել Իսրայելի օգտին լրտեսության և դիվերսիայի մեղադրանքով
Իրանում մահապատժի են ենթարկվել երկու անձինք, որոնք մեղադրվել են իսրայելական «Մոսադ» հետախուզական գործակալության հետ կապված լինելու մեջ։ Այս մասին հայտնում է իրանական Tasnim գործակալությունը։
Մահապատիժն իրականացվել է Գերագույն դատարանի կողմից նրանց դատավճիռները հաստատելուց հետո։
Ըստ դատավճռի, Մոհամմադ Մաասում Շահին և Համիդ Վալիդին «Մոսադ»-ի անդամներ էին, որոնք «Մոսադ»-ի սպաների հետ մեկնել էին Իրաքյան Քուրդիստան և ահաբեկչական գործողությունների և դիվերսիաների վերաբերյալ ուսուցում էին անցնել։
Մեղադրյալները ռազմական և հանրային օբյեկտների վրա հրկիզումներ էին իրականացրել և իրենց գործունեության տեսանյութերն ուղարկել են պատասխանատուներին՝ կրիպտոարժութային վճարումների դիմաց։
Tasnim գործակալությունը հայտնել է, որ լրտեսների գործունեությունը գտնվում էր անվտանգության ծառայությունների հսկողության տակ, երբ նրանց տրվել էր Թեհրանում հանրային ծառայությունների և ռազմական կենտրոնների վրա հարձակվելու նոր առաքելություն։
Նրանք ձերբակալվել էին հարձակում իրականացնելուց առաջ: Նրանց մոտ հայտնաբերվել էր արձակման պատրաստ տասը պայթուցիկ արկ:
Ավելի ուշ մեղադրյալների Քարաջում և Սպահանում գտնվող բնակարաններից, ինչպես նաև Թեհրանում գտնվող նրանց կազմակերպչական շտաբներից հայտնաբերվել և առգրավվել են զինամթերք, պատրաստի պայթուցիկ արկեր և ականանետային արկեր պատրաստելու համար նախատեսված նյութեր:
