Սիրիայի և Իսրայելի միջև հարաբերությունների կարգավորման շուրջ բանակցություններն ընթանում են զգալի դժվարություններով․ աշ-Շարաա
Սիրիայի և Իսրայելի միջև հարաբերությունների կարգավորման և անվտանգության համաձայնագրի կնքման շուրջ բանակցությունները փակուղի չեն մտել, սակայն դրանք ընթանում են զգալի դժվարություններով։ Այս մասին «Անադոլու» գործակալության հետ հարցազրույցում հայտնել է Սիրիայի նախագահ Ահմեդ աշ-Շարաան, որը Թուրքիայում մասնակցում է Անթալիայի 5-րդ դիվանագիտական ֆորումին։
«Մենք լրջորեն հանձնառու ենք անվտանգության համաձայնագրի հասնելուն, որը կպահպանի տարածաշրջանային կայունությունը։ Բանակցությունները փակուղի չեն մտել, սակայն դրանք ընթանում են զգալի դժվարություններով՝ Իսրայելի կողմից Սիրիայի տարածքում իր ներկայությունը պահպանելու համառության պատճառով», – հայտարարել է Սիրիայի նախագահը։
Նա նշել է, որ իր կարծիքով, Իսրայելը չափազանց կոշտ է վերաբերվում Սիրիային։ Այնուամենայնիվ, Դամասկոսը մտադիր չէ ուժով հակահարված տալ Իսրայելին և կշարունակի աշխատել երկկողմ հարաբերությունների զուտ դիվանագիտական կարգավորման ուղղությամբ՝ չնայած Լիբանանում շարունակվող լարվածությանը։
Անդրադառնալով Ուկրաինայի թեմային՝ նա նշել է, որ Կիևի և Դամասկոսի միջև հիմնական նախաձեռնությունը սիրիական նավահանգիստներով անհրաժեշտ ապրանքների և սննդամթերքի արտահանման հարթակ ստեղծելն է։
Բացի այդ, նախագահը հայտնել է, որ այժմ աշխատանք է տարվում Սիրիայի և Թուրքիայի միջև ազատ առևտրի գոտի ստեղծելու ուղղությամբ՝ Իդլիբում արդյունաբերական համագործակցությունը հեշտացնելու համար։
Աշ-Շարաան նաև բարձր է գնահատել Անթալիայում դիվանագիտական ֆորումի անցկացումը և Թուրքիայի դերը տարածաշրջանում։
«Թուրքիան նման միջոցառումների միջոցով նպաստում է ինչպես տարածաշրջանային, այնպես էլ համաշխարհային կայունությանը։ Թուրքիան իսկապես մեծ դեր է խաղում տարածաշրջանում և աշխարհում։ Թուրքական ընկերություններն ակտիվորեն մասնակցում են Սիրիայի ենթակառուցվածքների վերականգնմանը», – նշել է նա։
Հարցազրույցում աշ-Շարաան նաև Մերձավոր Արևելքի երկրներին կոչ է արել օգտագործել Սիրիայի լոգիստիկ հնարավորությունները՝ առևտրային ուղիները վերականգնելու և ԱՄՆ-ի և Իրանի միջև հակամարտության հետևանքները հաղթահարելու համար։
