Զինվորների լողանալու հարցով չեմ զբաղվում, տեղյակ չեմ՝ չլողացած զինվոր չունենք. Արման Սարգսյան
Բազմաթիվ երկրներում զինվորները ամեն օր լողանում են։ Հայաստանում, աֆրիկական մի քանի երկրներում ու տենց թերի զարգացած մի քանի երկրներում ա, որ շաբաթը մեկ են լողանում, լրագրողների հետ ճեպազրույցի ընթացքում ասաց ՔՊ-ական պատգամավոր Հայկ Սարգսյանը։
Սարգսյանի խոսքով՝ ինքն առաջարկել է, որ ստեղծվի հնարավորություն, որպեսզի զինվորները ամեն օր լողանան. «Երկու տարի անցել ա, նույն վիճակն ա։ Հա, հիմա ունենք որոշ տեղեր, որ զորքը կարում ա ամեն օր լողանա, բայց մեծամասամբ մեր տղերքը շաբաթը մեկ են լողանում։ Դե, թող ՊՆ ղեկավար կազմն էլ շաբաթը մեկ լողանա։ Թող մինչ այդ խնդրի լուծումը իրենք շաբաթը մեկ լողանան, տենամ՝ կարա՞ն»։
Պատգամավորն ասաց, որ առաջին անգամ է նման հրապարակային հայտարարություն անում, իր խոսքով, այլևս չի կարող «մեջը պահել»։
ՊՆ փոխնախարարն էլ լրագրողների հետ զրույցում հայտնել է, որ զինվորների լողանալու հարցով չի զբաղվում, տեղյակ չի՝ երբ են լողանում. «Ես չգիտեմ՝ պարոն Սարգսյանը ինչի մասին է խոսում, չլողացած զինվոր մենք չունենք։ Այդ ոլորտը ես չեմ համակարգում, բայց որևէ խնդիր այդ հարցով մինչև հիմա չի եղել»։
