Կալասը «տագնապալի ազդակ» է համարում ՆԱՏՕ-ից դուրս գալու Թրամփի հայտարարությունը
Եվրոպական միությունը պետք է ամրապնդի իր սեփական պաշտպանությունը՝ հաշվի առնելով ՆԱՏՕ-ի նկատմամբ ԱՄՆ-ի նոր դիրքորոշումը: Այս մասին հայտարարել է ԵՄ-ի արտաքին գործերի գերագույն ներկայացուցիչ Կայա Կալասը։
«Մեզ անհրաժեշտ է իրական արտադրություն, և մենք պետք է ամրապնդենք մեր սեփական պաշտպանությունը։ Իհարկե, ոչ ոք չի կարող փոխարինել ամերիկացիներին, քանի որ ՆԱՏՕ-ն կառուցված է դաշնակցային հարաբերությունների վրա», – ասել է Կալասը էստոնական ERR հեռուստառադիոհեռարձակողին տված հարցազրույցում։
Նա ՆԱՏՕ-ից Միացյալ Նահանգների հնարավոր դուրս գալու մասին ԱՄՆ-ի նախագահ Դոնալդ Թրամփի հայտարարությունները համարել է «տագնապալի ազդակ»։ «Սա շատ դժվար իրավիճակ է, որովհետև նախագահի խոսքը, անպայմանորեն, կշիռ ունի և ցույց է տալիս, թե ինչպես է նա մտածում։ Քանի որ ԱՄՆ-ի նախագահը շատ մեծ ազդեցություն ունի, դա, անկասկած, տագնապալի ազդակ է», – նշել է եվրոպական դիվանագիտության ղեկավարը։
Նրա խոսքով՝ «չի կարելի հիմնավորված համարել Թրամփի այն մեղադրանքները, թե ՆԱՏՕ-ն օգնության չի եկել Իրանի դեմ ռազմական գործողություններում: «Որքան ինձ հայտնի է, ՆԱՏՕ-ին ուղղված որևէ դիմում չի եղել», – հայտարարել է Կալասը։
Նրա խոսքով՝ Եվրոպան պետք է շարունակի ջանքեր գործադրել ինչպես պաշտպանական ներդրումների, այնպես էլ դաշնակցային հարաբերությունների ամրապնդման հարցում։
Ավելի վաղ Թրամփը մեղադրել էր դաշնակիցներին Հորմուզի նեղուցի ապաշրջափակման միջոցներին մասնակցելուց հրաժարվելու համար։
